హైదరాబాద్ బ్రాండ్ బ్యాడ్ చేయకుంటే చాలు

Posted: 09/14/2014 11:58 AM IST

తెలంగాణ ప్రభుత్వంపై కేంద్రమంత్రి వెంకయ్యనాయుడు పరోక్ష విమర్శలు చేశారు. బ్రాండ్ హైదరాబాద్ అంటూ గొప్పలు చెప్తున్న ప్రభుత్వం నగరాన్ని బ్యాడ్ హైదరాబాద్ చేయకుంటే చాలు అన్నట్లుగా విమర్శలు చేశారు. నగరం శక్తిని.. పేరును పెంచేలా మరికొన్ని కార్యక్రమాలు చేయాలని సూచించారు. హైదరాబాద్ లో ఉన్న వారంతా హైదరాబాదీలేనన్నారు. వారందరికీ సమాన అవకాశాలు, హక్కులు ఉంటాయని చెప్పారు. ఒకరు ఎక్కువ.., మరొకరు తక్కువ అనే తేడాలు ఉండవన్నారు. ఉప్పల్ లోని కంపనీ సెక్రటరిల భవనాన్ని కేంద్రమంత్రి ఆదివారం రోజు ప్రారంభించారు.

ఈ సందర్బంగా మాట్లాడుతూ భాగ్యనగరం గ్లోబల్ సిటీ అని.., ప్రపంచం నుంచి పెట్టుబడులు ఆకర్షించే శక్తి నగరానికి ఉందన్నారు. నగరంలో సంతోషంగా పెట్టుబడులు పెట్టవచ్చనీ., ఏ ఇబ్బంది ఉండదని చెప్పారు. అటు ప్రతిభ కలిగిన, పెట్టుబడులు పెట్టేందుకు ముందుకు వచ్చే సంస్థలను ప్రభుత్వం ప్రోత్సహించాలన్నారు. మోడి రాకతో దేశ ప్రజల్లో కొత్త ఆశలు చిగురించాయని చెప్పారు. దేశం ఖచ్చితంగా మారుతుంది అనే నమ్మకం ప్రజల్లో ఏర్పడిందన్నారు. కార్యక్రమంలో కంపనీ సెక్రటరీల ప్రతినిధులు.., పలువురు అధికారులు పాల్గొన్నారు.

 

కార్తిక్