మరోసారి కోర్టులో బుక్కైన బాద్షా షారుఖ్!

Posted: 09/13/2014 09:31 AM IST

బాలీవుడ్ బాద్షా తన మన్నత్ ఇంటిని అక్రమంగా నిర్మించాడంటూ ఇప్పటికే ఆయనపై ఎన్నో ఆరోపణలు వెల్లువెత్తిన విషయం అందరికీ తెలిసిందే! తాజాగా ఇప్పుడు ఆ విషయంపై షారుఖ్ మీద బాంద్రా కోర్టులో ఓ పిటిషన్ దాఖలైంది. సామాజిక కార్యకర్త అయిన నికోలస్ అల్మీదా ఈమేరకు కోర్టులో షారుఖ్ కు వ్యతిరేకంగా కేసు వేశారు. ప్రజల రాకపోకలకు ఇబ్బంది కలిగేలా షారుఖ్ తన ఇంటిని నిర్మించుకున్నాడని.. ఈ కట్టడాన్ని వెంటనే తొలగించాల్సిందిగా అనేకసార్లు అధికారులను విన్నవించినా.. వారు ఎటువంటి యాక్షన్ తీసుకోలేదని అల్మీదా వాపోయారు. అధికారుల నుంచి స్పందన లేకపోవడం కారణంతోనే ఈసారి ఆయన నేరుగా కోర్టును ఆశ్రయించాల్సి వచ్చిందని పేర్కొన్నారు.

ముంబైలోని మైంట్ మేరీ చర్చ్ కు దగ్గరలోనే షారుఖ్ ఖాన్ తన ఇల్లు ‘‘మన్నత్’’ను నిర్మించుకున్నాడు. అయితే తన ఇంటిపక్కనుంచే ఆ చర్చ్ కు వెళ్లడానికి ఒక అడ్డదారి వుండేది. దాని ద్వారా ప్రజలు ఇటువైపు నుంచి అటువైపు వెళ్లడానికి వీలుగా వుండేది. ఇక ఆదివారం రోజు అయితే చర్చీకి వెళ్లాల్సిన వాళ్లు ఆ దారి ద్వారానే వెళ్లేవారు. అయితే షారుఖ్ మాత్రం ఆ దారిని మూయించేసి తనకోసం అక్కడ ఒక ర్యాంప్ ను నిర్మించుకున్నారు. దీంతో రాకపోకలకు అవస్థలు పడుతున్న ప్రజలు ఈ విషయమై అధికారులకు చాలాసార్లు విన్నవించుకున్నారు. ఈ వివాదం ఇప్పటినుంచే కాదు.. గత రెండేళ్లనుంచి జరుగుతూనే వుంది. అయినా ఏ అధికారులు దీనిపై చర్యలు తీసుకోకపోవడంతో జనాలు కోర్టు మెట్లు ఎక్కాల్సి వచ్చింది.

షారుఖ్ మీద దాఖలైన పిటిషన్ వచ్చే నెల (అక్టోబర్) విచారణకు రానుంది. ఈ కేసులో షారుఖ్ తోపాటు ముంబై మున్సిపల్ కార్పొరేషన్ కమిషనర్, మరో ముగ్గురు అధికారులను కూడా ప్రతివాదులుగా చేర్చినట్లు తెలుస్తోంది. మరి ఈ బాద్షా ఈ వివాదం నుంచి ఎలా తప్పించుకుంటాడో వేచి చూడాల్సిందే! మరోవైపు దీపావళికి రానున్న ఇతని ‘‘హ్యాపీ న్యూ ఇయర్’’ మూవీ సందర్భంలో ఇటువంటి వివాదాల్లో చిక్కుపోవడంతో ఇది ఆ సినిమాపై ప్రభావం చూపే అవకాశం వుంది. కాబట్టి.. అంతలోనే షారుఖ్ ఈ కోర్టు ఇబ్బందుల నుంచి బయటపడితే మంచిదేనంటూ విశ్లేషకులు అభిప్రాయపడుతున్నారు.

AS