అనుష్క పేరుతో చాట్ చేసిన ఆర్మీ జవాను అరెస్టు

Posted: 09/10/2014 12:00 AM IST

దేశంలో సంచలనం రేపిన ఆర్మీ వ్యవహారాల చేరవేత కేసులో రెండవ అరెస్టు జరిగింది. దేశ సైనిక రహస్యాల చేరవేత కేసులో ఆర్మీ జవాను అసిఫ్ అలీని యూపీ పోలిసులు అరెస్టు చేయగా.., హైదరాబాద్ సీసీఎస్ పోలిసులు అదుపులోకి తీసుకున్నారు. కేసులో మొదటి నిందితుడు పతన్ కుమార్ పొద్దార్ ఇప్పటికే అరెస్టయి జైలులో ఉన్నాడు. రెండవ నిందితుడు అలీ మీరట్ లో జవానుగా పనిచేస్తున్నట్లు పోలిసులు వెల్లడించారు. ఉత్తర ప్రదేశ్ కోర్టులో హాజరు పర్చి పీటీ వారంటుపై హైదరాబాద్ కు తీసుకొచ్చి చంచల్ గూడ జైలుకు తరలించారు.

పతన్ కుమార్ పొద్దార్ తో అనుష్క అగర్వాల్ పేరుతో చాటింగ్ చేసి.., ఆర్మీ వివరాలు సేకరించింది అసిఫ్ అలీ అని గతంలోనే పోలిసుల విచారణలో తేలింది. ఇక పతన్ కుమార్ తో రాత్రి సమయంలో ఫోన్ లో మాట్లాడే మహిళ అలీ భార్యగా గుర్తించారు. ఆమె పాకిస్థాన్ దేశీయురాలుగా ధర్యాప్తులో వెల్లడయింది. దీంతో వీరిద్దరూ పాకిస్థాన్ కోసం పనిచేస్తున్నారని స్పష్టమయింది. ఫేస్ బుక్ ద్వారా పతన్ కుమార్ ను పరిచయం చేసుకుని.., స్నేహం చేసినట్లు నటించి రోజుకు గంటల తరబడి చాటింగ్ చేయటమే కాకుండా నగ్న ఫొటోలు, వీడియోలు ఎరగా వేసి ఆర్మీ రహస్యాలను అసిఫ్ అలీ, అతని భార్య రాబట్టారు.

పతన్ కుమార్ ఆర్మీ క్యాంపులో రాత్రిళ్లు గంటల తరబడి చాటింగ్ చేయటం, ఎక్కువ సమయం ఫోన్లు మాట్లాడటంపై నిఘా పెట్టిన ఉన్నతాధికారులు.., అతడు ఆర్మీ సమాచారం బయటకు చేరవేస్తున్నట్లు తెలిసి షాకయ్యారు. వెంటనే పోలిసులకు ఫిర్యాదు చేయగా.., ధర్యాప్తు చేసిన పోలిసులు పతన్ కుమార్ ను అరెస్టు చేశారు. అతనిపై దేశద్రోహం, సైనిక రహస్యాల చేరవేత, ఐటీ చట్టం, సహా ఇతర సెక్షన్లపై తీవ్రమైన నేరాభియోగాలు మోపారు. సైనికుడు అమ్మాయి వలలో పడి సైనిక రహస్యాలను చేరవేయటం దేశంలోనే సంచలనం కల్గించింది.

కార్తిక్