టీఆర్ఎస్ లోకి చేరిన తుమ్మల తప్పు చేశారు : కేసీఆర్

Posted: 09/05/2014 07:09 PM IST

(Image source from: tummala nageswara rao joined trs party in telangana bhavan along with his members)

టీడీపీ సీనియర్ నేత తుమ్మల నాగేశ్వరరావు గత కొన్నిరోజుల నుంచి టీఆర్ఎస్ పార్టీలోకి చేరునున్నారనే వార్తలకు తెరపడిపోయింది. ఇప్పటికే టీడీపీ పార్టీకి రాజీనామా ఇచ్చేసిన తుమ్మల... శుక్రవారం సాయంత్రం ఆయన తన అభిమానులతో కలిసి తెలంగాణ రాష్ట్ర భవన్ లో టీఆర్ఎస్ పార్టీలోకి చేరారు. ఈ నేపథ్యంలో తెలంగాణ ముఖ్యమంత్రి కేసీఆర్ ఆయనకు గులాబీ కండువా కప్పి.. పార్టీలోకి ఆహ్వానించారు. తుమ్మలతో వచ్చిన ఆయన అనుచరులు కూడా టీఆర్ఎస్ లోకి చేరిపోయారు. ఈ కార్యక్రమంలో టీఆర్ఎస్ సీనియర్ నేత - తెలంగాణ హోంశాఖ మంత్రి నాయిని నర్సింహారెడ్డితోపాటు టీఆర్ఎస్ నేతలు కే.కేశవరావు, రమణాచారి తదితరులు పాల్గొన్నారు.

ఇందులో భాగంగా తుమ్మల నాగేవ్వరరావు మాట్లాడుతూ... విభజన అనంతరం ఖమ్మం జిల్లాలకు ఏపీ, కేంద్ర ప్రభుత్వాలు తీవ్ర అన్యాయం చేశాయని ఆరోపణలు చేశారు. కేవలం తాను ఖమ్మం జిల్లాను అభివృద్ధి చేయడం కోసమే టీఆర్ఎస్ లోకి చేరానని... సీటు మీద తనకు ఏమాత్రం మోజులేదని తెలిపారు. గత ప్రభుత్వాలు చేసిన అన్యాయాలను సరిదిద్దుకోవడానికి శాయశక్తులా ప్రయత్నిస్తానని అన్నారు. అలాగే తెలంగాణను బంగారు తెలంగాణాగా మార్చాలన్న సీఎం లక్ష్యాన్ని నేరవేర్చడానకి తానూ కృషి చేస్తానని.. అందుకే పార్టీలోకి చేరానని చెప్పారు. ఉమ్మడి రాష్ట్రంలో జరిగిన మార్పులకు కేవలం తాను, కేసీఆర్ మాత్రమేనని చెప్పిన ఆయన.. కేసీఆర్ నేతృత్వంలోనే బంగారు తెలంగాణ సాధ్యమవుతుందని పేర్కొన్నారు.

ఈ నేపథ్యంలోనే కేసీఆర్ మాట్లాడుతూ.. ఇందులో తప్పు నాది కాదు తుమ్మలదేనని ఆయన నవ్వుతూ అన్నారు. తుమ్మల పార్టీలో చేరుతున్నారంటే ఇంతమంది వస్తారని తాను ఊహించలేదని.. కానీ భారీ సంఖ్యలో తరలివచ్చిన కార్యకర్తలకు స్వాగతం పలుకుతున్నానని అన్నారు. తుమ్మల అనుచరగణంతో టీఆర్ఎస్ భవన్ పూర్తిగా నిండిపోయింది. ఇది చూసి సంతోషించిన కేసీఆర్.. వాస్తవానికి ఈ కార్యక్రమాన్ని నిజాం కాలేజీ గ్రౌండ్స్ లో ఏర్పాటు చేసి వుంటే బాగుండేదని.. కానీ ఇంతమంది వస్తారన్న విషయాన్ని తుమ్మల నాతో చెప్పలేదని.. తానూ కూడా ఊహించలేదని అన్నారు. అందుకే ఇందులో తప్పు తనది కాదని.. తుమ్మలదేనని చమత్కరించారు.

అలాగే.. ఖమ్మం జిల్లాపై పూర్తి అవగాహన ఉన్నందున పాతవాళ్లను, కొత్తవాళ్లను కలుపుకుని టీఆర్ఎస్ ను ముందుకు తీసుకువెళ్లాలని తుమ్మల నాగేశ్వరరావును కేసీఆర్- కోరారు. కేవలం అభివృద్ధిని మాత్రమే అజెండాగా పెట్టుకుని తుమ్మల పార్టీలోకి చేరారని చెప్పిన ఆయన... ఖమ్మం జిల్లాను పూర్తిగా అభివృద్ధి చేస్తారనే నమ్మకాన్ని వ్యక్తం చేశారు. ఖమ్మంను విభజించి మరో జిల్లాను ఏర్పాటు చేసుకోవాల్సిన అవసరం ఉందని కేసీఆర్-అన్నారు.