పెద్ద ప్రమాదమే తప్పింది

Posted: 09/05/2014 01:00 PM IST

విశాఖలో పెద్ద ప్రమాదమే తప్పింది. ఎల్పీజీ గ్యాస్ లోడుతో వెళ్తున్న పెద్ద ట్యాంకర్ అదుపుతప్పి బోల్తా పడింది. అయితే ఈ ప్రమాదంలో ఎలాంటి నష్టం జరగలేదు. నేవీ డాక్ యార్డు సమీపంలోని ఐఓసీ పెట్రో పార్కు నుంచి పద్దెనిమిది టన్నుల గ్యాస్ నింపుకున్న ట్యాంకర్.., తనికీ కోసం ప్రయాణమైంది. మార్గ మద్యలో రోడ్డుపై అదుపుతప్పి పడిపోయింది. పక్కనే విద్యుత్ ట్రాన్స్ పార్మర్ కూడా ఉంది. దీంతో ప్రమాదం జరుగుతుందని అంతా భయపడ్డారు.

అయితే అదృష్టవశాత్తు ఎలాంటి ప్రమాదం జరగలేదు. డ్రైవర్ కు మాత్రం స్వల్ప గాయాలు అయ్యాయి. అతడిని ఆస్పత్రికి తరలించారు. విషయం తెలుసుకున్న ఇండియన్ ఆయిల్ కార్పోరేషన్ అధికారులు, పోలిసులు వెంటనే ఘటనాస్థలానికి చేరుకున్నారు. ట్యాంకర్ పేలే అవకాశం ఉండటంతో అటువైపు ప్రజలెవరినీ రానివ్వలేదు. ముందస్తు జాగ్రత్తగా పక్కనే ఉన్న ట్రాన్స్ ఫార్మర్ కు విద్యుత్ సరఫరా నిలిపివేశారు. ట్యాంకర్ నుంచి ఎలాంటి లీకేజి లేదని గుర్తించాక అంతా ఊపిరిపీల్చుకున్నారు. ఒకవేళ ఈ ట్యాంకర్ పేలి ఉంటే పెద్ద ప్రమాదం జరిగి ఉండేదని అధికారులు చెప్తున్నారు.

 

కార్తిక్