మోడి కోసం లాటరీ పెట్టిన అమెరికా

Posted: 09/03/2014 01:35 PM IST

ప్రధాని కాకముందు మోడికి కనీసం వీసా కూడా ఇవ్వని అమెరికా.. ఇప్పుడు ఆయన పర్యటనతో కొత్త తలనొప్ప ఎదుర్కుంటోంది. ఈ నెల చివరి వారంలో మోడి అమెరికా పర్యటనకు వెళ్తున్నారు. తొలి సారి అమెరికా పర్యటనకు దేశానికి వస్తున్న భారత ప్రధాని కోసం ఒబామా ప్రభుత్వం భారీ ఏర్పాట్లు చేస్తోంది. న్యూయార్క్ లోని ప్రముఖ మాడిసన్ స్వ్కేర్ గార్డెన్ లో పరిచయ కార్యక్రమం ఏర్పాటు చేశారు. ఈ కార్యక్రమంలో పాల్గొనాలనుకునే వారు దరఖాస్తులు పంపాలని ప్రజలను ఆహ్వానించారు. సెప్టెంబర్ 7వ తేదీ లోపు అప్లికేషన్లు పంపవచ్చని తెలిపారు.

ప్రకటన వెలువడ్డ కొద్ది గంటల్లోనే (సోమవారం అర్ధరాత్రి వరకు ) 20వేల దరఖాస్తులు వచ్చాయి. చివరి తేది ముగిసే నాటికి ఈ సంఖ్య మరింత పెరుగనుంది. అలస్కా, హవాయి వంటి దూరపు ప్రాంతాల నుంచి కూడా పరిచయ కార్యక్రమంలో పాల్గొనేందుకు దరఖాస్తులు రావటంతో అమెరికా ప్రభుత్వం ఆశ్చర్యపోయింది. ఏం చేయాలో తెలియక నిర్వాహకులు తలపట్టుకున్నారు. స్టేడియంలో గరిష్టంగా 20వేల మందికి సీటింగ్ సామర్ధ్యం ఉంది. అలాంటిది అప్లికేషన్లు వెల్లువలా వేల సంఖ్యలో వస్తుంటే ఎలా అనుకున్నారు. చివరకు ఉన్నతాధికారుల సూచన ప్రకారం లాటరీ పద్దతిలో ఎంపిక చేయాలని నిర్ణయించారు.

మోడికి ఉన్న క్రేజ్., పెరుగుతున్న అప్లికేషన్ల సంఖ్యను చూసి లాటరీనే సరైన మార్గంగా నిర్ణయించారు. పోని పెద్ద స్టేడియంలు ఏర్పాటు చేద్దామనుకున్నా.., మోడి పర్యటన తేదీల్లో మిగతా స్టేడియాలు వేరే కార్యక్రమాలకు బుక్ అయినట్లు అధికారులు చెప్పారు. దీంతో 20వేల సీటింగ్ సామర్ధ్యం ఉన్న మాడిసన్ గార్డెన్ బుక్ చేశారు. అమెరికాలో కూడా ఇంత క్రేజ్ సంపాదించిన మోడి మొదటి సభలో ఎవరు పాల్గొంటారో..., లాటరీ ఎవరిని వరించనుందో.

 

కార్తిక్