మూత్రవిసర్జన చేశాడని.. 4ఏళ్ల పిల్లాడిని చంపేశాడు!

Posted: 09/01/2014 02:44 PM IST

(Image source from: house owner chinna tippanna killed a 4 years old boy vinod for doing toilet in his compound)

మనదేశంలో మానవత్వం రానురాను మంటగలిసిపోతోందని చెప్పడానికి ఈ దారుణమైన ఉదంతాన్ని ఒక ఉదాహరణగా చెప్పుకోవచ్చు. నాలుగేళ్ల చిన్నారి తన ఇంటిముందు మూత్రవిసర్జన చేశాడనే కోపంతో ఆ ఇంటియజమాని అతణ్ణి తిరిగిరాని లోకాలకు పంపించేశాడు. అభంశుభం తెలియని ఆ పిల్లాడు చేసిన తప్పును సర్దిచెప్పాల్సిందిపోయి.. బలంగా కొట్టడం వల్ల ఆ చిన్నారి మృత్యువాత పడ్డాడు. దీంతో ఈ ఘటన స్థానికంగా కలకలం రేపింది. చంపిన నిందితుణ్ణి కఠినంగా శిక్షించాలంటూ మృతిచెందిన చిన్నారి తల్లిదండ్రులు, బంధువులు పోలీస్ స్టేషన్ ముందు ఆందోళనకు దిగారు.

వివరాల్లోకి వెళితే.. చిన్న తిప్పన్న, గంగాధర్ అనే ఇద్దరు వ్యక్తుల కుటుంబాలు పక్కపక్కనే వుంటున్నాయి. అయితే గతకొద్దికాలం నుంచి ఈ కుటుంబాల మధ్య ప్రతిచిన్న విషయంమీద ఏదో ఒక వివాదం రేగుతూనే వుంటుంది. దీంతో వీరిమధ్య కోపతాపాలు ఎక్కువయిపోయాయి. ఈ నేపథ్యంలో గంగాధర్ కుమారుడు వినోద్ అనే నాలుగేళ్ల చిన్నారి... చిన్న తిప్పన్న ఇంటి ఆవరణలో మూత్రవిసర్జన చేశాడు. ఈ విషయాన్ని గమనించి అతడు ఆగ్రహంతో వినోద్ చెంపమీద చాలాబలంగా కొట్టాడు. అంతే! ఆ చిన్నారి అక్కడికక్కడే పడిపోయాడు. దీంతో అతడికి ఏం జరిగిందోనన్న భయాందోళనలతో పిల్లాడిని వెంటనే ఆస్పత్రికి తరలించగా.. ఆ చిన్నారి అప్పటికే మృతిచెందినట్లు వైద్యులు నిర్ధారించారు.

దాంతో తల్లిదండ్రులు వినోద్ మృతదేహంతో పోలీస్ స్టేషన్ ముందు బైఠాయించారు. చిన్నపిల్లాడు తెలిసీతెలియని చేసిన పొరపాటుకు ఏకంగా ప్రాణాలనే తీయడం ఎంతవరకు న్యాయమో చెప్పాల్సిందేనంటూ మృతుని బంధువులు ఆవేదన వ్యక్తం చేస్తున్నారు. నిందితులను కఠినంగా శిక్షించాలని వారు డిమాండ్ చేశారు. దీంతో పోలీసులు కేసు నమోదు చేసి దర్యాప్తు చేపట్టారు. కర్నూలు జిల్లా ఆలూరు మండలం పెద్ద హోతూరులో ఈ దారుణం జరిగింది.