కమ్యూనిస్టుల కోసం తలుపు తీసిన మమత

Posted: 08/30/2014 01:19 PM IST

కమ్యూనిస్టులంటేనే కస్సుమనే బెంగాల్ దీదీ మమతా బెనర్జి ఇప్పుడు మెత్తబడ్డారు. ఎరుపు రంగుపై మక్కువ పెంచుకుంటున్నారు. కమలాన్ని అడ్డుకోవాలంటే కమ్యూనిస్టులతో కలవక తప్పదని తెలుసుకున్నారు. అందుకోసం తాను సిద్ధమని కూడా ప్రకటించారు. సీపీఎం కలిసి వస్తామంటే కలుపుకు పోయేందుకు తమ తలుపులు ఎప్పుడూ తెరిచే ఉంటాయని చెప్పింది. బీజేపిని అడ్డుకునేందుకు సీపీఎంతో కలిసి పనిచేసేందుకు సిద్దమని ఓ టీవీ ఛానెల్ కు ఇచ్చిన ఇంటర్వ్యూలో తెలిపింది.

వాజ్ పాయ్ ను బీజేపి అవమానించింది

రాజకీయాల్లో ఎవరూ అంటరానివారు కాదని.., తృణముల్ కాంగ్రెస్ గతంలో అనేక పార్టీలతో పొత్తులు కుదుర్చుకుందన్న విషయం గుర్తు చేశారు. అదే విధంగా ఒక పార్టీకి చెక్ చెప్పేందుకు మరొకరితో చేతులు కలపక తప్పదన్నారు. బీహార్ లో లాలూ, నితీష్ దోస్తి ఇందుకు ఉదాహరణగా చెప్పారు. ఆల్ ఇట్ హ్యాపెన్స్  ఇన్ పాలిటిక్స్ అని నీతి భోధించారు. తాను గతంలో బీజేపితో కలిసి పనిచేశానని అయితే ఇప్పుడు వారి విధానాలు మారిపోవటంతో పొత్తు కుదుర్చుకోలేదన్నారు. గతంలో వాజ్ పాయ్ ఉన్నందున ఆయన కోసం బీజేపితో జతకట్టానన్నారు. అయితే మహోన్నత వ్యక్తిని కమలదళం అవమానించిందని విమర్శించారు. బెంగాల్ లో అడుగుపెట్టామనుకుంటున్న బీజేపీ ముందుగా ఐదు సీట్లు గెలిచి తమ సత్తా చాటుకోవాలని సవాల్ విసిరారు.

అయితే మమతా బెనర్జి ప్రకటనపై కమ్యూనిస్టు నేతలు ఆగ్రహం వ్యక్తం చేశారు. బీజేపి బెంగాల్ లో అడుగుపెట్టడానికి బెనర్జినే కారణమన్నారు. ఏకు మేకు అయ్యే సరికి మమతకు భయం పుట్టుకొచ్చిందని విమర్శించారు. బీజేపితో స్నేహంగా మెలిగినందుకు ముందుగా ప్రజలకు క్షమాపణలు చెప్పాలన్నారు. ఆ తర్వాత లౌకికవాద పోరాటంపై దృష్టపెడతామని స్పష్టం చేశారు.

కార్తిక్