మోడీ కొత్త ట్విస్ట్.. బ్యాంకు ఖాతా వుంటేనే పథకాలు!

Posted: 08/26/2014 06:30 AM IST

(Image source from: pm narendra modi introducing jandhan yojana scheme for people)

అధికారాన్ని చేజిక్కించుకున్నప్పటి నుంచి ప్రధాని నరేంద్రమోడీ దేశ అభివృద్ధి పేరుమీద సంచలన నిర్ణయాలు తీసుకుంటున్నట్టు తెలుస్తోంది. గతంలో ఎన్నడూలేని విధంగా రైలు ఛార్జీలను బారీగా పెంచేసి, ప్రయాణికులకు చుక్కలు చూపించిన విషయం తెలిసిందే! అలాగే వంటగ్యాస్, పెట్రోలు, డీజెల్ వంటి తదితర ధరలను కూడా పెంచేశారు. దీంతో తీవ్ర ఆగ్రహానికి గురయైన దేశప్రజలు ‘‘ఎందుకిలా చేశారు’’ అంటూ ప్రశ్నించగా.. దానికి బదులు మోడీ.. ‘‘దేశ అభివృద్ధి కోసం కొన్నింటిని త్యాగం చేసుకోక తప్పదు. అందులో భాగంగానే ఛార్జీలను పెంచాల్సి వచ్చింది’’ అంటూ సర్దుబాటు చేసుకున్నారు. ఇక తాజాగా మోడీ మరో కొత్త వినూత్నమైన నిర్ణయాన్ని తీసుకున్నట్టు వార్తలు వస్తున్నాయి.

భారతదేశంలో వున్న ప్రతి పేదకుటుంబానికి బ్యాంకు ఖాతా తప్పనిసరిగా వుండాల్సిందేనని పేర్కొన్న మోడీ.. అప్పుడే ప్రజలకు ప్రభుత్వ సంక్షేమ ఫలాలు నేరుగా అందుతాయని స్పష్టం చేశారు. ఢిల్లీలో ప్రత్యేకంగా బ్యాంకర్లతో జరిగిన సమావేశంలో మాట్లాడుతూ.. మొత్తం 7 కోట్ల పేద కుటుంబాలకు బ్యాంకు ఖాతాలు ఇవ్వాలనే లక్ష్యంతో ‘‘జన్ ధన్ యోజన’’ చేశారని.. దానిని పూర్తి చేసే దిశగా త్వరగా కార్యక్రమాలను నిర్వహించాల్సిందిగా ఆయన అన్నారు. ఇలా చేయడం వల్ల ప్రభుత్వం ప్రజలకోసం ప్రత్యేకంగా ఇచ్చే సంక్షేమ ఫలాలు నేరుగా వారికే చేరుతాయన్నది ఆయన అభిప్రాయం!

అయితే మోడీ వ్యాఖ్యానాలను బాగా గమనిస్తే.. కేవలం బ్యాంకు ఖాతాలు వున్నవారికే సంక్షేమ పథకాలు అమలు జరిగేలా నిర్ణయం తీసుకున్నట్టు తెలుస్తోంది. ఒకవేళ బ్యాంకు ఖాతాలేని వారి పరిస్థితి ఏంటో మరి! నిజానికి పల్లెటూళ్లలో వుండే రైతులకు, పేద ప్రజలకు చదవడంగానీ, రాయడంగానీ ఏమీ తెలియదు. మరి అటువంటివారికి ఈ బ్యాంకు ఖాతాల గురించి ఏమి తెలుస్తోంది..? వారికి ప్రత్యేకంగా కొంతమంది అధికారులను ఏర్పాటు చేయించి, బ్యాంకు ఖాతాలు ఓపెన్ చేయిస్తారా..? అంటూ ప్రశ్నలు సంధించినా కోణంలో ఆయన పార్టీ వర్గీయులు అందుకు అన్ని ఏర్పాట్లు సిద్ధం చేస్తామని పేర్కొన్నారు. మరి ఈ కార్యక్రమం ఎప్పుడు, ఎక్కడి నుంచి ప్రారంభిస్తారో వేచి చూడాలి..?

AS