సింగపూర్ సెజ్ పై కేసీఆర్ కన్ను

Posted: 08/24/2014 09:49 AM IST

తెలంగాణ సీఎం ఏది అనుకున్నా పట్టువదలని విక్రమార్కుడిలా సాధిస్తాడని అందరికి తెలుసు. అలా పట్టుపట్టే తెలంగాణ సాధించాడు. ఇప్పుడి విక్రమార్కుడి దృష్టి సింగపూర్ సెజ్ లపై పడింది. ఏదయినా సింగపూర్ సిటీలా ఉండాలని బాబు చెప్తుండటంతో అసలేముందీ సింగపూర్ లో అని ఆ దేశ పర్యటనకు వెళ్ళిన కేసీఆర్.., అక్కడ అనేక విషయాలు తెలుసుకుంటున్నారు. సింగపూర్ అధికారులు, ప్రభుత్వ నేతలను కలిసి తెలంగాణ పరిస్థితులను వివరిస్తున్నారు. తాము కూడా తెలంగాణ సింగపూర్ కావాలని కోరుకుంటున్నట్లు చెప్పారు. అక్కడ పర్యటనలో భాగంగా కేసీఆర్ సింగపూర్ ఐటీ సెజ్ ను పట్టుకున్నారు. ఇంకేముంది సారు అనుకుంటే ఎలా అయినా సాధిస్తారన్న విషయం తెలిసిందే కదా.., చివరకు సింగపూర్ కంపనీ కూడా సెజ్ కు ఓకే చెప్పింది.

త్వరలోనే హైదరాబాద్ లో ఐటీ సెజ్ ఒకటి కొత్తగా ఏర్పాటు కానుంది. సింగపూర్ కు చెందిన ఓ ప్రైవేటు కంపనీ నిజాంపేటలో ఐటి, ఐటీ ఆధారిత సెజ్ ఏర్పాటుకు ఆసక్తి చూపుతోంది. కేసీఆర్ పర్యటనలో దీనిపై చర్చించి గ్రీన్ సిగ్నల్ ఇచ్చినట్లు సమాచారం. సుమారు 160 ఎకరాల్లో సెజ్ ఏర్పాటు కానుంది. సీఎం మలేషియా, సింగపూర్ పర్యటనలు ముగించుకుని వచ్చిన తర్వాత సెజ్ ఏర్పాటుపై అధికారిక ప్రకటన చేసే అవకాశముంది. అయితే సెజ్ పెట్టే కంపనీ పేరు, పెట్టుబడి వివరాలు, ప్రభుత్వ వాటా వంటి అంశాలపై ఇంకా ఎలాంటి సమాచారం బయటకు రాలేదు. మొత్తానికి విదేశీ పర్యటనలో ఉన్న తెలంగాణ పెద్దన్న ప్రజల కోసం మంచి గిఫ్టులే తెస్తున్నారు. మరి అవి ఎలా పనిచేస్తాయో తర్వాత తెలుస్తుంది.

 

 

కార్తిక్