చిన్నది కాదు.., పెద్దదే

Posted: 08/22/2014 01:42 PM IST

మహిళలపై నోటికొచ్చినట్లు మాట్లాడితే ఏ మవుతుందో అందరికి తెలుసు. అధికార పక్షమా, ప్రతిపక్షమా అనేది పక్కనబెట్టి విమర్శలను ఎదుర్కోక తప్పదు. అలాంటిది దేశంలోనే సంచలనం రేపిన నిర్భయ గ్యాంగ్ రేప్ దుర్ఘటనపై వివాదాస్పద కామెంట్ చేసి నాలుక కరచుకున్న అరుణ్ జట్లీ తేరుకున్నారు. తన కామెంట్ పై వివరణ ఇచ్చారు. ప్రసంగంలో జరిగిన పొరపాటుకు విచారం వ్యక్తం చేశారు. తన ఉద్దేశ్యాన్ని తప్పుగా అర్ధం చేసుకున్నారని వివరణ ఇచ్చారు. తన ఉద్దేశ్యం నిర్భయ ఘటన చిన్నది కాదని.., ఆ ఒక్క సంఘటనను దృష్టిలో ఉంచుకుని అలా మాట్లాడలేదన్నారు. మహిళల సమస్యలంటే ఎప్పుడూ సున్నితంగా స్పందిస్తాననీ.., వారిపై నేరాలను ఎప్పుడూ క్షమించనన్నారు. జనరల్ గా అన్న మాటకు తప్పుగా చూడవద్దని కోరారు.

గురువారం జరిగిన రాష్ర్టాల పర్యాటక మంత్రుల సమావేశంలో అరుణ్ జైట్లీ పాల్గొన్నారు. అత్యాచారం లాంటి చిన్న ఘటనలు ప్రపంచ వ్యాప్తంగా ప్రచారమై దేశ పర్యాటక రంగానికి కోట్ల రూపాయలు నష్టం కల్గిస్తుందని చెప్పారు. దీనిపై తీవ్ర దుమారమే రేగింది. నిర్బయ లాంటి భయానక ఘటనలు, అత్యాచారాలను మంత్రి చిన్నవిగా చెప్పటంపై ప్రతిపక్షాలు, మహిళాసంఘాలు ఆగ్రహం వ్యక్తం చేశాయి. డబ్బుకు మహిళా సమస్యలతో ముడిపెట్టి చూడటం ప్రభుత్వానికి తగదని హెచ్చరించాయి. ప్రసంగంలో జరిగిన తప్పును తెలుసుకున్న జైట్లీ చివరకు వివరణ ఇచ్చారు. అటు ప్రసంగం రికార్డుల్లో చిన్న అనే పదాన్ని ప్రభుత్వం తొలగించింది.

కార్తిక్