ఇక ఆర్టీఓ ఆఫీసులుండవు?

Posted: 08/20/2014 10:11 AM IST

పాలనలో విప్లవాత్మక మార్పులు తీసుకొస్తున్న ప్రధాని మోడి.., త్వరలోనే మరో ప్రభుత్వ శాఖ సంస్కరణకు సిద్దం అవుతున్నారు. అవినీతికి అడ్డాగా మారుతున్న ఆర్టీవో ఆఫీసులను రద్దు చేయాలని మోడి సర్కారు యోచిస్తోంది. ఇందుకు గల సాధ్యాసాధ్యాలపై ఇప్పటికే చర్చలు జరిగినట్లు కూడా సమాచారం. డ్రైవింగ్ లైసెన్సు జారి సహా, వాహన రిజిస్ర్టేషన్ ఆర్టీవో కార్యాలయంతో సంబంధముండే ఇతర పనుల కోసం ప్రత్యేక వ్యవస్థను రూపొందిస్తున్నట్లు కేంద్ర రవాణ శాఖ మంత్రి నితిన్ గడ్కరీ తెలిపారు. ఇందుకోసం త్వరలోనే మోటార్ వాహన చట్టాన్ని సవరిస్తామన్నారు. అయితే ఆర్టీవో వ్యవస్థ రద్దుపై వేగంగా ముందుకు కదులుతున్న సర్కారు.., ఈ పార్లమెంటు సమావేశాల్లోనే బిల్లు పెట్టే అవకాశముందని ఊహాగానాలు వస్తున్నాయి.

 

అమెరికా, సింగపూర్, జపాన్, జర్మనీ, కెనడా లాంటి దేశాల్లో అమల్లో ఉన్న విధానాలు, అత్యాధునిక సాంకేతిక పరిజ్ఞానంను మన దేశంలో ప్రవేశఫెట్టాలని మోడి భావిస్తున్నారు. దీని వల్ల డ్రైవింగ్ లైసెన్స్ జారీ సులభం కానుంది. అంతేకాకుండా అక్రమాలకు కూడా అడ్డుకట్ట పడుతుందని కేంద్రం చెప్తోంది. ఆర్టీవో కార్యాలయాలు అవినీతికి అడ్డాగా మారుతున్నాయి. డ్రైవింగ్ లైసెన్సు జారీ, రెన్యువల్, వాహన ఫిట్ నెస్, రిజిస్ర్టేషన్ ఏ పని కావాలన్నా అధికారుల చేయి తడపాల్సిందే లేదంటే.., బ్రోకర్లను ఆశ్రయించాలి. నేరుగా వెళ్తే పని జరిగేది డౌటే అది కూడా సరైన సమయానికి పూర్తవుతుందని ఎవరూ చెప్పలేరు. ఆర్టీవో ఆఫీసులను నమ్ముకునే కొందరు దళారులు తమ వృత్తిగా మార్చుకున్నారు. ఇప్పుడీ వ్యవస్థ ప్రక్షాళనకు శ్రీకారం చుట్టడంతో ఇక అవినీతికి అడ్డుకట్ట పడుతుందని అంతా ఆశిద్దాం. ఈ విధానమైనా ప్రజలకు ఉపయోగ పడేలా ఉండాలని కోరుకుందాం.  

 

కార్తిక్