మానవత్వాన్ని చాటిచెప్పిన సీఎం కేసీఆర్!

Posted: 08/14/2014 05:57 PM IST

(Image source from: cm kcr met child heart patient in apollo hospitals)

తెలంగాణ రాష్ట్ర మొదటి ముఖ్యమంత్రి కల్వకుంట్ల చంద్రశేఖరరావు (కేసీఆర్) గురించి ప్రత్యేకంగా చెప్పుకోవాల్సిన అవసరం లేదు. తనదైన తెలంగాణ యాసలో ప్రత్యర్థులను మాటల తూటాలతో కుళ్లబొడిచడంలో ఈయనకు ఈయనే సాటి. ఏ నేతనైనా సరే.. వారిలో వున్న తప్పులను, చెడు గుణాలను పీల్చిపిప్పి చేసి, గూపిలాగి మరీ వ్యాఖ్యలు చేస్తారు. ఒక్కమాటలో చెప్పుకోవాలంటే ఇన్నాళ్లవరకు మనమందరం ఉగ్రరూపాన్ని మాత్రమే చాలా ఎక్కువ సందర్భాల్లో చూశాము. అయితే ఆయన ఎంత పక్కా రాజకీయవేత్తో అంతే నికార్సైన మానవతావాది కూడా! అందుకు ఆయనకు సంబంధించిన తాజా సంఘటనను ఉదాహరణగా తీసుకోవచ్చు.

వరంగల్ జిల్లాలోని నర్మెట్టకు చెందిన శరత్ అనే ఓ చిన్నారి గుండెజబ్బు కారణంగా మృత్యువుతో పోరాడుతున్నాడు. దీంతో అతనికి మెరుగైన చికిత్సను అందించేందుకు అతని కుటుంబసభ్యులు హైదరాబాద్ లోని అపోలో హాస్పిటల్ కు తీసుకొచ్చారు. అక్కడ చికిత్స పొందుతున్న నేపథ్యంలో ఆ చిన్నారి ఒక అరుదైన కోరిక కోరాడు. చివరి సారిగా తెలంగాణ సీఎం కేసీఆర్ ను చూడాలనుందని తన మనసులోని మాటను వెల్లడించాడు. ఇక అంతే సంగతులు!

ఈ విషయాన్ని తెలుసుకున్న కేసీఆర్.. మరేమీ ఆలోచించకుండా తన పనులన్నింటినీ వదిలేసి మరీ ఆ అబ్బాయిని కలవడానికి అపోలోకి పయనమయ్యారు. అక్కడ చిన్నారి శరత్ ను పరామర్శించి తన పెద్ద మనుసును చాటుకున్నారు. ఈ సందర్భంగానే ఆయన మాట్లాడుతూ.. శరత్ కు మెరుగైన చికిత్స కోసం ఎంత ఆర్థిక సాయం చేయడానికైనా సిద్ధమని, అతని కుటుంబం కోసం ప్రత్యేకంగా ఒక ఇంటిని కూడా నిర్మిస్తామని ఆయన హామీ ఇచ్చారు. ఇలా ఈ విధంగా ఆయన తనలో వున్న మానవత్వాన్ని చాటిచెప్పారు.