చేతబడి చేసిందని... నగ్నంగా ఊరేగించారు!

Posted: 08/13/2014 04:26 PM IST

The villagers beat and paraded naked woman for doing black magic

ఒకవైపు మన భారతదేశం సాంకేతికపరంగా ముందుకు దూసుకుపోతుంటే.. మరోవైపు చిన్నచిన్న గ్రామాల్లో మూఢనమ్మకాల పర్వం పెచ్చుమీరిపోతోంది. ఎవరో ఏదో చేయిస్తే, ఎక్కడో వున్నవారు మరణిస్తారని... పిచ్చిపిచ్చి చేష్టలు చేస్తుంటారని... దీనినే చేతబడి అంటూ అభివర్ణిస్తుంటారు. ఇది ఇప్పటినుంచి కాదు... ప్రాచీనకాలం నుంచి గ్రామాల్లో వస్తున్న ఆచారం! వారికి సాంకేతికంగపరంగా జ్ఞానాన్ని అందించే నాధులు లేకపోవడం వల్ల ఇటువంటి మూఢనమ్మకాలకు బలైపోతున్నారు. తాజాగా ఈ మూఢనమ్మకం వల్లే ఓ మహిళ తీవ్ర అవమానానికి గురవ్వాల్సి వచ్చింది.

బీహార్ లోకి కతిహార్ జిల్లా సక్రైలి గ్రామంలో సభ్యసమాజం సిగ్గుతో తలదించుకోవాల్సిన ఓ దారుణమైన సంఘటన చేసుకుంది. ఆ గ్రామంలో ఓ బాలుడు తీవ్ర అనారోగ్యంతో మృతిచెందాడు. అయితే ఆ గ్రామంలోనే వున్న కినియా దేవి అనే మధ్యవయస్సురాలు చేతబడి చేయించడం వల్లే ఆ బాలుడు మరణించాడనే అనుమానిస్తూ ఆమెపై ఆరోపణలు వెల్లువెత్తారు. దీంతో ఆ బాలుడి బంధువులు ఆమెను చావబాదారు. అంతటితో ఆగకుండా ఆమెతో అశుద్ధం తినిపించి, ఆ గ్రామమంతా నగ్నంగా ఊరేగించారు. ఇంత అన్యాయం జరుగుతున్నా.. గ్రామస్థులు మాత్రం అడ్డుకోకుండా చూస్తుండిపోవడం విశేషం.

ఇంతలో ఈ ఘోరమైన ఘటన గురించి తెలుసుకున్న పోలీసులు గ్రామానికి చేరుకుని... ఈ ఘాతుకానికి పాల్పడిన ఆరుగురిమీద కేసు నమోదు చేశారు. అందులో ఐదుగురి పరారీలో వుండగా.. ఒకరిని అరెస్ట్ చేశారు. కేవలం ఈ ఒక్క ఘటనే కాదు... బీహార్ లోని మారుమూల ప్రాంతాల్లో చేతబడి చేయిస్తున్నారని ఆరోపణలు చేసి ఎంతోమంది మహిళలను చిత్రహింసలకు గురిచేస్తున్నారు. దీనిని అదుపుచేయడానికి ప్రయత్నించినవారు బలైపోతున్నారే తప్ప... దారుణాలు మాత్రం ఆగడం లేదు. దీనిపై బీహార్ మానవహక్కుల కమిషన్ ఆగ్రహం వ్యక్తం చేస్తూ.. తక్షణమే చర్యలు తీసుకునే దిశగా అడుగులు వేస్తోంది.