అనుకుందొకటి.., అయ్యిందొకటి

Posted: 08/13/2014 03:40 PM IST

Mayawathi refuses to join with mulayam to fight on bjp

ఎస్పీ అదినేత ములాయం సింగ్ కు మాయావతి ఝలక్ ఇచ్చింది. బీజేపీని ఎదుర్కునేందుకు తనతో మాయ కలిసివస్తుందనుకున్న ములాయం ఆశలు ఆవిరయ్యాయి. ఎస్పితో చేతులు కలిపే ప్రసక్తే లేదని బహెన్ స్పష్టం చేసింది. మాయతో దోస్తి కోరుకుంటున్నట్లు ములాయం మనసులో మాట బయట పెట్టిన కొద్ది సేపట్లోనే మాయావతి ప్రెస్ మీట్ పెట్టారు. ఎట్టి పరిస్థితుల్లో ఎస్పీతో కలవమన్నారు. ఈ సమావేశంలో ములాయం సింగ్ ను అతని పార్టీని, ప్రభుత్వాన్ని వరుసపెట్టి కడిగిపారేశారు. సమాజ్ వాదీ పార్టీతో కలిసి పనిచేయటం అనే ఆలోచన లేదన్నారు. మతతత్వ శక్తులతో కలిసి కుట్రలు చేసే వ్యక్తులతో తాము ఎప్పుడూ వ్యతిరేకమని ప్రకటించారు.

ములాయం సింగ్ అధికారం కోసం ఎప్పుడూ పరితపిస్తుంటాడనీ.., పవర్ కోసం ఏది చేయటానికైనా వెనకడుగు వేయడని విమర్శించారు. మతం రంగు పులుముకున్న అతని చేతులను తాకనని తేల్చి చెప్పారు. అధికారమే పరమావధిగా అవకాశవాద రాజకీయాలకు పాల్పడే వ్యక్తి ములాయం అని మాయావతి ద్వజమెత్తారు. సమాజ్ వాదీ మాత్రమే కాదు యూపీలో ఏ పార్టీతో పొత్తు పెట్టుకోమని ప్రకటించారు. ఒంటరిగానే ఎన్నికలను ఎదుర్కుంటామన్నారు. బీఎస్పీకి ప్రజల మద్దతు ఎప్పుడూ ఉంటుందని విశ్వాసం వ్యక్తం చేశారు. ఎన్నికలు ఎప్పుడు వచ్చినా ఎస్పీని ప్రజలు ఇంటికి పంపటం ఖాయంగా జోస్యం చెప్పారు. దుష్ట పాలకులను రానున్న ఎన్నికల్లో కిందకు దించుతారని ధీమా వ్యక్తం చేశారు.

లాలూపై మండిపడ్డ మాయ !!

చివరగా ఎస్పీ-బీఎస్పీ కలవాలని ముందుగా ప్రతిపాదించిన లాలూ ప్రసాద్ యాదవ్ ను కూడా మాయావతి వదిలిపెట్టలేదు. యాదవ సోదరులిద్దరికి అధికార దాహం పట్టుకుందని లాలూ, ములాయంను ఉద్దేశించి చురకలంటించారు. ఇందుకోసం వారు కుట్రలకు పాల్పడుతున్నారని ద్వజమెత్తారు. పొత్తులపై మాట్లాడే ముందు 1995నాటి ఘటనను గుర్తుకు చేసుకోవాలన్నారు. 1995లో ఓ గెస్ట్ హౌజ్ లో మాయావతిపై ఎస్పీ ఎమ్మెల్యేలు దాడి చేయటంతో పాటు అవమానకరంగా ప్రవర్తించారు. ఇలాంటి వారితో కలిసి పనిచేస్తామని లాలు ఎలా అనుకుంటారని ప్రశ్నించారు. గుండాయిజంకు పాల్పడుతున్న సమాజ్ వాదీ పార్టీని ప్రజలు ఘోరంగా ఓడిస్తారని మాయావతి స్పష్టం చేశారు.

కార్తిక్