భర్తను కట్టేసి నిప్పుపెట్టిన భార్య

Posted: 08/13/2014 10:11 AM IST

ఆడవారికి భూదేవికి ఉన్న సహనం ఉంటుందంటారు. మరి ఆ సహనం నశిస్తే..., ఉగ్ర కాళిక రూపం తప్పదని అందరికి తెలుసు. కార్యేశు దాసి, కరణేశు మంత్రి, బోజ్యేషు మాత, శయనేశు రంభ మాత్రమే కాదు.., ఇప్పుడు ధైర్యేశు వనిత అనక తప్పదు. అంటే ధైర్యంలో ఆడవారిలా ఉండాలని అవును ఇప్పుడు మహిళలు చాలా దైర్యవంతులు అవుతున్నారు. ఒకప్పుడు ఎవరు ఏ మాట అన్నా తమలో తాము బాదపడే వారు తప్ప.. ఎదురు సమాధానం చెప్పేవారు కాదు. కానీ కాలంతో పాటు వారూ మారారు. తమపై రోజురోజుకూ పెరుగుతున్న దాడులను ఎదుర్కోవటం మొదలుపెట్టారు. దెబ్బకు దేవుడయినా భయపడతాడు అన్నట్లు మంచిగా చెప్తే ఎవరూ వినరని తెలుసుకున్నారు. చివరకు కట్టుకున్న మొగుడయినా కష్టపెడతే కన్నెర్రజేస్తామని హెచ్చరిస్తున్నారు.

అలాంటిదే ఈ సంఘటన. విజయనగరం జిల్లాలో కట్టుకున్న భర్తను సజీవ దహనం చేసిందో భార్య. గరివిడి మండలం వెదుల్ల వలసలో ఓ దంపతులు నివాసం ఉంటున్నారు. వీరి కుటుంబంలో కొద్దికాలంగా గొడవలు అవుతున్నాయి. తరుచుగా కలహాలు ఏర్పడటంతో పాటు, భార్యను చంపేయటానికి భర్త ప్రయత్నించాడు. దీంతో ఆగ్రహం కట్టలు తెంచుకున్న ఆ మహిళ భద్రకాళీ అవతారమెత్తింది. తనపై దాడికి దిగిన భర్తను తల్లి సహకారంతో చెట్టుకు కట్టేసింది. తనను చంపటానికి ప్రయత్నించిన భర్తను సజీవ దహనం చేసింది. విషయం తెలుసుకున్న పోలిసులు తల్లి, కూతురును అరెస్టు చేశారు. కుటుంబ వివాదాల వల్లే ఈ ఘటన జరిగిందని వారు వివరణ ఇచ్చారు. కూర్చుని చర్చించుకుంటే ఎంత పెద్ద సమస్యైనా పరిష్కారమవుతుంది. ఆవేశంలో భర్త అలా చేసుండకూడదు. లేదంటే ఈ పరిస్థితి వచ్చేది కాదు. వారు జైలుకు వెళ్ళేవారు కాదు.

కార్తిక్