సచిన్ కు సెలవిచ్చిన రాజ్యసభ

Posted: 08/11/2014 04:48 PM IST

మాస్టర్ బ్లాస్టర్ సచిన్ పై నెలకొన్న వివాదానికి తెరపడిందనే చెప్పాలి. రాజ్యసభకు డుమ్మాపై విమర్శలకు ముగింపు పలికేలా చైర్మన్ హమిద్ అన్సారి నిర్ణయం తీసుకున్నారు. మాస్టర్ బ్లాస్టర్ పెట్టుకున్న లీవ్ లెటర్ ను అన్సారీ ఆమోదించారు. దీంతో కొద్ది రోజులుగా క్రికెట్ దేవుడిపై వస్తున్న విమర్శలు ఇక ఆగిపోతాయని ఆశించవచ్చు. క్రీడా రంగంలో చూపిన ప్రతిభకు మెచ్చిన యూపీఏ సర్కారు సచిన్ ను రాజ్యసభకు నామినేట్ చేసింది. బ్యాటింగ్ పరుగుల వరద పారించే మనవాడు, పార్లమెంటు హాజరులో మాత్రం వెనకబడ్డాడు. ఎంతలా అంటే ఈ ఏడాది ఒక్క సెషన్ కు కూడా హాజరుకానంత వెనకబడ్డాడు. ఇంకేముంది ఎవరైతే ఏంటి, ఎందుకైతే మాకేంటన్నట్లు వ్యవహరించే రాజకీయ నేతలకు ఇదో అంశంగా అవకాశంలా దొరికింది. సచిన్ గైర్హాజరిపై ఒక పార్టి విమర్శలు చేస్తే.., ఆయనకు మరోపార్టి మద్దతిచ్చింది. దీంతో క్రికెట్ కు అప్రకటిత అంబాసిడర్ గా ఉన్న సచిన్ కాస్తా ఓ పార్టి వ్యక్తిగా మారిపోయాడు.

ఈ వివాదానికి వెంటనే ముగింపు పలకకపోతే మొదటికే మోసం వస్తుందనుకుని వెంటనే మేల్కొన్నాడు. తాను సభకు రాలేననీ.., సెలవు ఇవ్వాలని దరఖాస్తు చేసుకన్నాడు. దీన్ని డిప్యూటి చైర్మన్ పీజే కురియన్ రాజ్యసభలో చదివి విన్పించారు. ఈ సమయంలోనూ కొందరు గౌరవ సభ్యులు గొడవ చేశారు. ఎందుకు రావటం లేదో స్పష్టమైన కారణం చెప్పాలన్నారు. అయితే ఇది అవసరం లేని విషయంగా చెప్తూ సెలవును ఇస్తున్నట్లు ప్రకటించారు.

తన సోదరుడి అనారోగ్యం కారణంగా కొంతకాలం పాటు తాను ముంబైని వదిలి రాలేనని సచిన్ చెప్పాడు. అంతేకాకుండా వ్యక్తిగత పనులు, కుటుంబ కార్యక్రమాల వల్ల సభకు రాలేకపోతున్నట్లు వివరించాడు. వాస్తవానికి సచిన్ కు గత వారమే హమిద్ అన్సారి క్లీన్ చిట్ ఇచ్చారు. అయితే మన పార్టీల నేతలు అలా కాదు కదా. ఓ మాట అంటేనే వారికి అదో తృప్తి. క్రికెట్ లాగే రాజకీయం కూడా సాఫీగా సాగదని సచిన్ ఇప్పుడు తెలుసుకోవాలి.