పార్లమెంట్ లో అల్లరి చేసిన మొద్దబ్బాయి!!

Posted: 08/06/2014 05:24 PM IST

కాంగ్రెస్ ఉపాధ్యక్షుడు రాహుల్ గాంధీకి కోపమొచ్చింది. సోనియా కొడుకైనా సాదా సీదాగా ఉండే యువనేత తనలోని ఆవేశరూపాన్ని బయటపెట్టాడు. ఇంకేముంది సభలో ఎప్పుడూ మాట్లాడని యువనేత ఒక్కసారిగా పార్లమెంటు వెల్ లోకి దూసుకొచ్చాడు.

ఉత్తరప్రదేశ్లో జరిగిన మత హింసపై చర్చ జరపాలని లోక్ సభలో కాంగ్రెస్ సభ్యులు కోరారు. అయితే స్పీకర్ సుమిత్రా అందుకు అంగీకరించలేదు. దీంతో ఆగ్రహంతో ఊగిన రాహుల్.., వెల్ లోకి వచ్చాడు. స్పీకర్ ఏకపక్షంగా వ్యవహరిస్తున్నారని మండిపడ్డారు. విపక్షాలకు అవకాశం ఇవ్వరా.., తాము మాట్లాడే అవసరం లేదా అంటూ ప్రశ్నించారు. పనిలో పనిగా ప్రధాని మోడిపై కూడా విమర్శలు చేశారు. సభ తీరు చూస్తే కేవలం ఒక్కరే మాట్లాడాలి అన్నట్లు ఉందని పరోక్షంగా ప్రధానిపై విమర్శలు గుప్పించారు.

ప్రధాన ప్రతిపక్ష హోదా కూడా దక్కించుకోలేని కాంగ్రెస్ మాటలు ఎవరు వింటారులే అన్నట్లు మోడి ప్రభుత్వం తన పని తాను చేసుకుపోతుంది. పూర్తి స్థాయి సంఖ్యాబలం ఉండటంతో.., ఆడిందే ఆట పాడిందే పాట అన్నట్లు చేస్తోంది. అయితే ఇవన్నీ చూస్తు వస్తున్న కాంగ్రెస్ ప్రకటించని భావి ప్రధాని అభ్యర్ధి, చిర్రెత్తి సభలో శివాలెత్తాడు. దీంతో పార్లమెంటేరియన్లతో పాటు కాంగ్రెస్ నేతలు రాహుల్ గరం గరంపై ఆసక్తిగా చర్చించుకుంటున్నారు.