కెసిఆర్ చెణుకులను ఆస్వాదించేవారికి శుభవార్త

Posted: 07/29/2014 09:09 AM IST

తెలంగాణా రాష్ట్ర ముఖ్యమంత్రి కె చంద్రశేఖర రావు మాటలు విపక్షాలకు ఎంత నిశితంగా తగుల్తాయో ఆయన అభిమానుల గుండెల్లో అంతగా గిలిగింతలుపెడతాయి.  అందువలన ఆయన సభకు వచ్చేవాళ్ళంతా ఆయన ఏదో కొత్తరకంగా విమర్శలు గుపిస్తారని, మా బాగా ఎత్తిపొడుపులతో, వ్యంగ్యాస్త్రాలతో, హాస్య ఛలోక్తులతో నవ్విస్తూ, కవిస్తూ మాట్లాడుతారని, అది వినటానికే వస్తారు.  వేదిక మీద ఉన్న నాయకులు కూడా నవ్వుతూనేవుంటారు.  అలా ఆయనకంటూ తెలంగాణా అభిమానులు చాలామంది ఉన్నారు ఆయన నోటి లోంచి వచ్చే మాటలను విని హాయిగా నవ్వుకోవటానికి ఎందుకంటే ఏ సమస్య వచ్చినా ఆయన విమర్శించేది ఆంధ్రోళ్లని, చంద్రబాబు నాయుడినే కాబట్టి.  

ఇక ఆయన ప్రతిసారీ మీడియా ముందుకు వచ్చి తన వ్యాఖ్యలను వినిపించాల్సిన అవసరం లేకుండా కెసిఆర్ సోషల్ మీడియాను ఉపయోగించుకోబోతున్నారు.  ట్విట్టర్లో తన వ్యాఖ్యలు ప్రతిరోజు వెల్లడించబోతున్నారు.  ఫేస్ బుక్ ముఖ్య మంత్రి కార్యాలయం అకౌంట్ ద్వారా ప్రభుత్వ కార్యకలాపాలను తెలియజేయబోతున్నారు.  దాని ద్వారా తెలంగాణా ప్రజల మనోభావాలను ఎప్పిటికప్పుడు ప్రజల స్పందనద్వారా తెలుసుకోబోతున్నారు.  అంటే సోషల్ మీడియా ద్వారా ప్రజలకు చేరువలోకి వెళ్తూ వాళ్ళతో ఇంటరాక్ట్ అవబోతున్నారు.  

కాకపోతే వచ్చిన సమస్యేమిటంటే, తెలుగులో ఆయన మాటల ధాటి సోషల్ మీడియాలో కనిపించకపోవచ్చు.  మరొక విషయమేమిటంటే, ఆయన మాటలు విని వెంటనే కరతాళ ధ్వనులతోనో, లేక కేరింతలతోనూ ప్రేక్షకులు వాళ్ళ స్పందన తెలియజస్తున్నప్పుడు వచ్చే కిక్ వేరు.  ఉత్సాహం రెట్టంపవుతుంది, మాటల జోరు పెరుగుతుంది, వినేవాళ్ళకి ఇంకా పసందుగా ఉంటుంది.  కానీ ట్విట్టర్లో అవేమీ ఉండవు.  కానీ ఫాలోయింగ్ మాత్రం బాగా ఉంటుందని అంచనా వేస్తున్నారు.  

-శ్రీజ