పద్మాలయ, అన్నపూర్ణ స్టూడియోల మీద వేటు?

Posted: 07/21/2014 08:34 AM IST

సీనియర్ నటులు అక్కినేని నాగేశ్వరరావు, సూపర్ స్టార్ కృష్ణ లకు స్టూడియోల కోసం తక్కువ ధరకు కేటాయించిన ప్రభుత్వ స్థలాలలో పూర్తిగా ఆ పని కోసం వినియోగించుకోకపోవటం, ఇతర వ్యాపారాలకు వాడుకోవటం లాంటి ఫిర్యాదులో గతంలో కూడా వచ్చాయి కానీ ఆ ప్రభుత్వాలు ఆ విషయంలో పెద్దగా పట్టించుకున్న దాఖలాలు లేవు.  ఎకరం ఐదు లక్షలు పలుకుతున్న సమయంలో ఆ భూములను ఎకరానికి కేవలం ఎనిమిదివేల చొప్పున వసూలు చేసి కేటాయించారు.  నాలుగు నుంచి ఐదు వందల కోట్ల వరకు విలువచేసే ఈ భూములను లోగడ ప్రభుత్వం స్వాధీనం చేసుకోవటానికి చూడగా అప్పటి ముఖ్యమంత్రి వైయస్ రాజశేఖర రెడ్డి ఆ ప్రతిపాదనను తిరస్కరించారు.  

కానీ తెలంగాణా రాష్ట్రం ఏర్పడ్డ తర్వాత హైద్రాబాద్ లోని భూముల మీద దృష్టి పెట్టిన ముఖ్యమంత్రి కె చంద్రశేఖర రావు ఏ అక్రమ నిర్మాణాలను, అక్రమ వినియోగాలను, కబ్జాలను వదిలిపెట్టవద్దని, నోటీసులు కూడా ఇవ్వవలసిన పనిలేదు, కూల్చివేయండని విస్తృత మైన అధికారాలను ఇవ్వటంతో హైద్రాబాద్ భూముల క్రమబద్ధీకరణ కొనసాగుతోంది.  కమిషనర్ ఎస్ కె సిన్హా ఈ భూమల దుర్వినియోగం జరిగిందని అనటంతో భవిష్యత్తులో ఈ భూముల విషయంలో ఏం జరగబోతుంది, మరేమి రాబోతున్నాయని సినీ పరిశ్రమలో బిక్కుబిక్కుమంటున్నారు.  ఇప్పటికే దర్శకుడు రాఘవేంద్రరావు కూడా ఆయన తండ్రికి కేటాయించిన భూమి విషయంలో ఆదుర్దాగానే ఉన్నారు.  

-శ్రీజ