రంగంలోకి దిగిన ‘‘జనసేన’’ పార్టీ!

Posted: 07/19/2014 01:09 PM IST

పవర్ స్టార్ పవన్ కల్యాణ్ సార్వత్రిక ఎన్నికల ముందు ప్రజల సంక్షేమం కోసమంటూ ‘‘జనసేన’’ పార్టీని స్థాపించిన విషయం తెలిసిందే! అయితే ఈ పార్టీకి గుర్తింపు రాకపోవడంతో ఇన్నాళ్లవరకు ఈ పార్టీకి సంబంధించిన విషయాలు తెరపైకి రాలేదు. ఈ నేపథ్యంలో తమ పార్టీకి గుర్తింపు లభించేలా ఆ పార్టీ సిబ్బంది ముందడుగు వేసినట్టు కనిపిస్తోంది. తాజాగా ఎన్నికల కమీషన్ వద్ద జనసేన పార్టీ గుర్తింపు కోసం దరఖాస్తు చేసుకున్నామని, దీనిపై ఎవరికైనా అభ్యంతరాలు వుంటే ఇప్పుడే తెలిపాలని ఆ పార్టీ కోరింది. ఈమేరకు ఆ పార్టీ శుక్రవారంనాడు ఒక ప్రకటనను కూడా విడుదల చేసింది.

కేంద్ర ఎన్నికల సంఘం వద్ద ఎవరైనా పార్టీని నమోదు చేయించుకుంటే... అందుకు సంబంధించి బహిరంగంగా ప్రకటన చేయాల్సి వుంటుంది. ఈ నేపథ్యంలోనే జనసేన పార్టీ కూడా తన తరఫున ప్రకటన విడుదల చేసింది. ఎన్నికల ముందు పార్టీని ఏర్పాటు చేసిన పవన్ కల్యాణ్.. ఆ సమయంలో పోటీ చేసేందుకు తక్కువ అభ్యర్థులు వుండటం వల్ల ఎన్నికల్లో పోటీ చేయడం లేదని స్పష్టం చేశారు. అయితే ఇప్పుడు తొలిసారిగా తెలంగాణా నుంచి ఆ పార్టీ తన అదృష్టాన్ని పరీక్షించుకునేందుకు రాజకీయ రణరంగంలో ప్రవేశించబోతోందని రాజకీయ విశ్లేషకులు చెబుతున్నారు. ఈసారి జరగబోయే జీహెచ్ఎంసీ ఎన్నికల్లో ఆ పార్టీ కూడా పాల్గొనేందుకు ఏర్పాట్లు సిద్ధం చేసుకుంటోందని సమాచారం!