ఇంతోటిదానికి ఇక్కడికెందుకొచ్చినట్లు- కేంద్రం

Posted: 07/18/2014 08:39 AM IST

ఉమ్మడి రాజధాని హైద్రాబాద్ లో శాంతి భద్రతల విషయంలో ఏమీ తేల్చలేక చేతులెత్తేసింది కేంద్ర ప్రభుత్వం.  గవర్నర్ కి శాంతి భద్రతల బాధ్యతను అప్పగించాలా వద్దా అన్న విషయంలో ఆంధ్రప్రదేశ్, తెలంగాణా రాష్ట్రాలనుంచి వెళ్ళిన ప్రతినిధులు తమ తమ వాదనలు గట్టిగా వినిపించారు.  ఎవరూ తగ్గకపోయేసరికి, ఇంతోటిదానికి ఇక్కడిదాకా ఎందుకొచ్చినట్లంటూ కేంద్ర ప్రభుత్వం చిరాకు చూపించింది.  అలాగే విద్యుత్ కొనుగోలు ఒప్పందాల మీద కూడా చర్చ జరిగింది.  అందులోనూ ఎవరూ తగ్గలేదు.  చివరకు మేము చట్టం చేసాం ఇక మీరే తేల్చుకోండని కేంద్రం చేతులెత్తేసింది.  

ఆంధ్రప్రదేశ్, తెలంగాణా రాష్ట్రాల ప్రధాన కార్యదర్శులు కేంద్ర హోం మంత్రిత్వశాఖ కార్యదర్శి అనిల్ గోస్పామితో ఢిల్లీలో భేటీ అయ్యారు.  సుదీర్ఘ చర్చల అనంతరం, ఏం చెప్పాలో పాలుపోని కేంద్రం ఇక ఇందులో చర్చించేందుకేమీ లేదు.  చట్టంలోనే అంతా ఉంది చూసుకోండని అనటం జరిగింది.  చట్టంలో ఉన్నమాట నిజమే కానీ దాని అమలు గురించే కదా వివాదమంతా అని అంటే, ఇది చాలా సున్నితమైన సమస్య, ఇందులో నేనేమీ మాట్లాడటానికి లేదు, ఇరు రాష్ట్రా ప్రభుత్వాలూ మీమీ వాదనలనే గట్టిగా పట్టుకుని కూర్చుంటే నేను చేసేదేమి లేదన్నారు గోస్వామి.  

అదీ అసలు సంగతి.  ఎవరినీ నొప్పించదలచుకోలేదు కేంద్ర ప్రభుత్వం.  మీరు మీరు  తేల్చుకోండి అనేదానికి ఇక్కడిదాకా ఎందుకు పిలిపించినట్లని రాష్ట్రాల నుంచి వెళ్ళిన ప్రతినిధులు కూడా అన్నారు.  ఇక అధికారుల స్థాయిలో చర్చించి కూడా ప్రయోజనం లేదని అర్థమై వృధా ప్రయాసే అయిందే అని ఆంధ్రప్రదేశ్ ప్రతినిధే ఎక్కవగా బాధపడ్డట్టుగా తెలుస్తోంది.  

ఇక ఇతర అంశాలైన జలాల పంపిణీ లాంటి సమస్యలకు కూడా కేంద్రం లో ఎటువంటి పరిష్కారాన్నీ చూపలేదు.

-శ్రీజ