తెదేపా నిర్బంధంలో రోజా?

Posted: 07/16/2014 02:41 PM IST

సినీ నటి, వైయస్ ఆర్ కాంగ్రెస్ పార్టీలో నాయకురాలు, నగరి ఎమ్మెల్యే రోజాను తెలుగుదేశం కౌన్సలర్లు నిర్బంధంలో ఉంచారన్న వార్తలు వినిపిస్తున్నాయి.   నగరిలో మున్సిపాలిటీ కూడా వైయస్ ఆర్ కాంగ్రెస్ పార్టీకే కైవసమైంది.  

ఆంధ్రప్రదేశ్ లో సార్వత్రిక, నగరపాలిక, మున్సిపాలిటీ, స్థానిక ఎన్నికల సమయంలోను తెలుగుదేశం, వైయస్ ఆర్ కాంగ్రెస్ పార్టీల మధ్య వైషమ్యాలు పార్టీ కార్యకర్తలు, నాయకుల మధ్య తగాదాలు, హింసాకాండలకు చోటివ్వటం రాష్ట్ర అభివృద్ధి దృష్ట్యా శ్రేయస్కరం కాదు.  అసలే ఆర్థిక సమస్యలు, మరెన్నో సమస్యలతో కొట్టుమిట్టాడుతున్న నవ్యాంధ్ర ప్రదేశ్ లో అంతర్గత కలహాలు, పార్టీల మధ్య నువ్వా నేనా అనే పోటీలు ప్రజా ప్రయోజనాల దృష్ట్యా క్షేమదాయకం కాదు.  

ఇరు పార్టీల కార్యకర్తలు ప్రతి విషయంలోనూ వాగ్వివాదంతో మొదలై కొట్టుకునేంత వరకూ రావటమనేది రాష్ట్ర ప్రగతికి దెబ్బ తీసే అంశమే.  

ప్రకాశం జిల్లాలో రామతీర్థం జలాశయ గేట్లను అక్కడి ఎమ్మెల్యే ప్రమేయం లేకుండా ఎత్తివేసారని సమాచారం.  ఎమ్మెల్యే సురేష్ అక్కడి వెళ్తే ఆయనను రాకుండా అడ్డుకోవటం వంటి సంఘటనలు ఇంకా వైరాన్ని, అగాధాన్ని పెంచుతాయే కానీ సమస్యలకు పరిష్కారం కాదు.  

నగరిలో జరిగిన స్థానిక వివాదంలో ఇరు పార్టీలూ ధర్నాలు నిర్వహించారు.  పర్యవసానంగా తెదేపా కౌన్సిలర్లు రోజాని నిర్బంధించారన్న వార్త సంచలనం రేపుతోంది.

-శ్రీజ