రైతు రుణాల రీషెడ్యూల్ సాధ్యం కాదు : కేటీఆర్

Posted: 07/15/2014 02:35 PM IST

(Image source from: it minister ktr comments on farmer loans)

తెలంగాణ రాష్ట్రంలో వున్న రైతు రుణాల మాఫీపై తెలంగాణ ప్రభుత్వం నుంచి ఇంకా సరియైన నిర్ణయం తీసుకోలేదు. రైతు రుణాల మాఫీపై తెలంగాణ ప్రభుత్వం కట్టుబడి వుందని మొదటి నుంచి మంత్రులు చెబుతూనే వున్నారు. తాజాగా తెలంగాణ ఐటీశాఖమంత్రి కేటీఆర్ కూడా ఈ విషయంపై కొంతవరకు క్లారిటీ ఇచ్చారు.

హైదరాబాదులోని ఐటీసీ కాకతీయ హోటల్ లో జరిగిన ఫైనాన్షియల్ సెక్టార్ కాన్ క్లేవ్ సదస్సుకు మంత్రి కేసీఆర్ ముఖ్య అతిథిగా పాల్గొన్నారు. ఈ నేపథ్యంలో ఆయన రైతురుణాలకు సంబంధించి స్పష్టత ఇచ్చారు. రైతు రుణాల రీషెడ్యూల్ కాదని... ఏకంగా రుణాలే మాఫీ చేయిస్తామని ఆయన హామీ ఇచ్చారు. ఎటువంటి పరిస్థితుల్లోనైనా రైతులకు అన్యాయం జరగకుండా తెలంగాణ ప్రభుత్వం రుణాలు మాఫీ చేసి, వారిని ఆదుకుంటుందని ఆయన స్పష్టం చేశారు.

అలాగే హైదరాబాద్ లో పారిశ్రామికాభివృద్ధికి టీఆర్ఎస్ ప్రభుత్వం అన్ని రకాలుగా సహకరిస్తుందని... కొత్త కొత్త ప్రాజెక్టులు నిర్మించడానికి అన్నివిధాలుగా అనుమతులను మంజూరు చేయిస్తుందని, కొత్త పెట్టుబడిదారులు నిర్భయంగా తమ పెట్టుబడులు పెట్టుకోవచ్చని ఆయన వెల్లడించారు. దేశంలోనే రెండో రాజధానిగా హైదరాబాద్ నగరాన్ని టీఆర్ఎస్ ప్రభుత్వం తీర్చిదిద్దుతుందని ఆయన చెప్పారు.