నాటు బాంబు పేలుడులో ఆరుగురికి గాయాలు

Posted: 07/12/2014 05:44 PM IST

ఉగ్రవాద చర్యలు ఎక్కువగా జరుగుతున్న నార్త్ ఈస్ట్ ప్రాంతంలో నాటుబాంబు పేలి ఆరుగురికి గాయాలయ్యాయి, నలుగురి అపహరణ కూడా జరిగిందని ఆ తర్వాత జరిగిన దర్యాప్తులో తేలింది.  

మణిపూర్ రాజధాని ఇంఫాల్ లోని మణిపూర్ యూనివర్శిటీ ప్రాంతంలో జరిగిన ఈ ఘటనలో ఆ పక్కనుంచి పోతున్న ఆరుగురు గాయాలపాలయ్యారు.  అందులో ఇద్దరి పరిస్థితి విషమంగా ఉందని పోలీసులు చెప్తున్నారు.  బాంబు పేలిన స్థలంలో ఉన్న నలుగురు ముస్లిం వ్యాపారులు కనిపించకపోవటంతో వాళ్ళు అపహరణకు గురయ్యారని అధికారులు అనుమానిస్తున్నారు.

మణిపూర్ లోని డజన్ వేర్పాటువాదుల సంస్థలు అప్పుడప్పుడు అదాటున వేటు వేసి పారిపోతుంటారు.  కానీ ఈ సారి జరిగిన ఘటనకు బాధ్యులెవరన్నది ఇంతవరకు ఎవరూ ప్రకటించలేదు.  వ్యాపారుల అపహరణకు గురయ్యారని చెప్పటానికి గుర్తుగా వాళ్ళ చెప్పులు, బ్యాగ్ లు ఘటనా స్థలిలో లభించాయి.  

నేషనల్ డెమాక్రాటిక్ ఫ్రంట్ ఆఫ్ బోడోల్యాండ్ బోడోలకు ప్రత్యేక రాష్ట్రం కావాలని దశాబ్దాలుగా పోరాటం చేస్తోంది.  అది మూడు వర్గాలుగా చీలి, అందులో రెండు వర్గాలు ప్రభుత్వంతో చర్చలు సాగిస్తున్నాయి కానీ ఒక వర్గం మాత్రం చట్టాన్ని తన చేతుల్లోకి తీసుకుని మారణహోమం సృష్టిస్తోంది.

మయన్మార్, చైనా దేశాలతోనే ఎక్కువ సంబంధ బాంధవ్యాలున్న స్థానికులు, ఢిల్లీలోని ప్రభుత్వం వారి గురించి పట్టించుకోవటం లేదని ఆరోపిస్తున్నారు.  నలుగురు ముస్లిం వ్యాపారుల అపహరణకు పర్యవసానంగా సమీప రాష్టమైన అస్సాం లోని బక్సాలో కర్ఫ్యూ విధించటం జరిగింది. రాష్ట్రంలోని పోలీస్ డైరెక్టర్ జనరల్ ఖజేన్ శర్మ మాట్లాడుతూ, బోడో ల్యాండ్ నేషనల్ డెమాక్రాటిక్ ఫ్రంట్ పనే అయ్యుండాలని అన్నారు.  

మే నెలలో బక్సాలో బోడో ట్రైబ్ కి చెందినవాళ్ళు పొరుగు దేశమైన బంగ్లాదేశ్ నుంచి వచ్చారన్న ఆరోపణ చేస్తూ 45 మంది ముస్లింలను హతమార్చారు.  వాళ్ళ ఇళ్ళను తగులబెట్టారు, కనిపించినవారినల్లా తుపాకులతో కాల్చి చంపారు.

-శ్రీజ