కేసీఆర్ దయవల్ల మేం రోడ్డున్న పడ్డాం!

Posted: 07/05/2014 02:01 PM IST

(Image source from: power problems in ayyappa society)

కేసీఆర్ ప్రభుత్వం జారీచేసిన ఆదేశాలమేరకు అక్రమంగా నిర్మించిన కట్టడాలను కూలుస్తున్న విషయం తెలిసిందే! ఇందులో భాగంగానే అయ్యప్ప సొసైటీలోనూ, గురుకుల్ ట్రస్ట్ భవన్ లోనూ కొన్ని భవనాలు అక్రమంగా నిర్మించారని నిర్ధారించి, కూల్చేశారు. ఇప్పుడు తాజాగా అయ్యప్ప సొసైటీకి విద్యుత్ షాకిచ్చి... అక్కడ నివసిస్తున్న ప్రజలకు తీవ్ర ఆందోళనలు కలిగిస్తోంది.

ఎన్నడూలేని విధంగా ఒకేసారి ఏకంగా మూడురెట్ల విద్యుత్ ఛార్జీల వసూలుకు బిల్లును పంపించింది. దీంతో అక్కడ నివాసమున్న ప్రజలు తీవ్ర అలజడికి గురవుతున్నారు. ‘‘ఒకేసారి ఇంత విద్యుత్ ఛార్జీ బిల్లును పంపిస్తే మొత్తం జీతం దీనికే అంకితం చేయాల్సి వస్తుంది’’ అని అక్కడి జనాలు అలమటిస్తున్నారు. ఇది నిజంగానే కుట్రపన్ని వేధిస్తున్నారని కొంతమంది తన భావనను వ్యక్తం చేస్తున్నారు. మరోవైపు పాతబస్తీ వంటి ప్రదేశాల్లో అసలు కరెంటు బిల్లు కొన్ని నెలలుగా కట్టనివారు వున్నారని, అయితే నెలవారీగా సక్రమంగా కట్టినా ఇలా విద్యుత్ మోత మోగించడం ఎంతవరకు సమంజసమని మరికొంతమంది ఆవేదన వ్యక్తం చేశారు.

తెలంగాణ ప్రభుత్వ వైఖరిని బాగా గమనిస్తే... అయ్యప్ప సొసైటీలో వున్నవారికి నీటి కష్టాలు, విద్యుత్ ఛార్జీల బాదుడుతో అక్కడి నుంచి తరిమేయాలనే భావనతో అదేపనిగా కుట్రపన్ని ఇలా చేస్తోందని కొంతమంది రాజకీయ విశ్లేషకులు ఆరోపణలు చేస్తున్నారు. ‘‘ఒకవేళ ఇది నిజమే అయితే... ఇందులో మానవత్వ కోణం గురించి ఆలోచించాల్సిన పరిస్థితి వుండదా..? తెలంగాణ ప్రభుత్వం ఎంతవరకు సరియైనది..?’’ అని రాజకీయ విశ్లేషకులు చర్చించుకుంటున్నారు.