మోడీ సీరియస్-నర్సులకు విముక్తి!

Posted: 07/05/2014 08:25 AM IST

46 abducted indian nurses freed in iraq will be back home today

ఇరాక్ లో సేవలందించేందుకు వెళ్లి ఉగ్రవాదుల చేతుల్లో బందీలయిన 46 మంది భారతీయుల నర్సులకు ఎట్టకేలకు విముక్తి లభించింది. వారం రోజులుగా అటు కేంద్ర ప్రభుత్వాన్ని, ఇటు కేరళ రాష్ర్ట ప్రభుత్వాన్ని ఉక్కిరిబిక్కిరి చేసిన నర్సుల కిడ్నాప్ వ్యవహారం ఎట్టకేలకు సుఖాంతం అయ్యింది. ఉగ్రవాదుల చెరలోవున్న 46 మంది నర్సులను ఈరోజు ఉదయం ప్రత్యేక విమానంలో కేరళకు తీసుకొస్తున్నట్లు ఆ రాష్ర్టప్రభుత్వం ప్రకటించింది.

గత మూడురోజులుగా ఇరాక్‌లోని తిక్రిత్ పట్టణంలో ఓ ఆసుపత్రిలో చిక్కుకున్న 46 మంది భారతీయ నర్సులను తరలించేందుకు మిలిటెంట్లు ప్రయత్నించినప్పటికీ వాళ్లంతా నిరాకరించారు. దీంతో తెల్లవారుజామున బాంబులు పేల్చి, నర్సులను భయభ్రాంతులకు గురిచేసి, బలవంతంగా మూడు బస్సుల్లోకి ఎక్కించి తరలించారు. తిక్రిత్ పట్టణం నుంచి తొలుత మోసుల్ వైపు తీసుకెళ్లారు. నర్సులను ఎక్కడికి తీసుకెళ్లినదీ వివరాలు తెలియకపోవడంతో ఇటు ప్రభుత్వం, నర్సుల బంధువుల్లో ఆందోళన నెలకొంది.

మోదీ సర్కార్ ఈ విషయాన్ని సీరియస్‌గా తీసుకుని ఆ దేశంతో పలుమార్లు మంతనాలు జరిపింది. చివరకు తిరుగుబాటుదారులతో ఇరాక్ ప్రభుత్వం జరిపిన చర్చలు ఫలించాయి. చివరకు నర్సులందరు క్షేమంగా వున్నారు. తిరుగుబాటుదారుల నుంచి ఎర్బిల్ నగరానికి వాళ్లంతా బస్సులో రానున్నారు. వారిని ఇండియాకు తీసుకువచ్చేందుకు నిన్న సాయంత్రం ఎయిర్ ఇండియా విమానం ఎర్బిల్ ప్రాంతానికి వెళ్లనుంది.

ఆ విమానంలో కేంద్రం, కేరళ అధికారులు వెళ్లనున్నారు. ఎర్బిల్ నుంచి వాళ్లని కేరళకు తీసుకువస్తారు. ఈరోజు ఉదయం 7 గంటలకు నర్సులతో విమానం కోచికి చేరుకుంటుందని ఆ రాష్ట్ర ముఖ్యమంత్రి ఉమెన్‌చాందీ చెప్పారు. ఇటు నర్సుల కుటుంబంలో సంతోషం వ్యక్తమైంది. ఈవిషయం తెలుసుకున్న నర్సుల తల్లిదండ్రులు ఊపీరి పీల్చుకున్నారు.