బాబా ముస్లిం కాబట్టే గంగలో మునగలేదట ఎప్పుడూ!

Posted: 06/29/2014 02:39 PM IST

ద్వారకా పీఠాధిపతి శంకరాచార్య స్వామి స్వరూపానంద మరోసారి సాయిబాబా ముస్లిం అని, అందుకే హిందువులకు పవిత్రమైన గంగానదిలో మునగటానికి ఇష్టపడేవారు కాదని వ్యాఖ్యానం చేసారు.  సాయిబాబా తన భక్తులతో తాను ముస్లిం నని ప్రకటించుకుని గంగానదిలో స్నానం చెయ్యవద్దని చెప్పేవాడని కూడా స్వామి స్వరూపానంద అన్నారు.  

అంతేకాదు, ఆయన తను ముస్లింనని చెప్పుకున్నప్పుడు ఆయన విగ్రహాన్ని గంగానదిలో ఎందుకు ముంచుతున్నారని కూడా ఆయన ప్రశ్నించారు.  అంతటితో అయిపోలేదు.  సాయిబాబా భక్తులు శ్రీరాముడిని కొలవరాదని కూడా ఆయన అన్నారు.  

అంతకు ముందు కూడా సాయిబాబా మానవమాత్రుడే కానీ దేవుడు కాదని, ఆయనకు గుళ్ళు కట్టి పూజలు చెయ్యటం తగదని, కట్టిన గుళ్ళు చాలు ఇంకా కట్టవద్దని అన్నారు.  పురణాల ప్రకారం కలియుగంలో అవతార పురుషులు ఇద్దరేనని, ఒకరు బుద్ధుడు, రెండవ అవతారం కల్కి కలియుగాంతంలో వస్తారని, అందులో ఎక్కడా సాయిబాబా పేరు లేదని, అందువలన భూమ్మీదకు వచ్చిన అవతార మూర్తి కాదని సాయిబాబా గురించి అన్నారాయన.  

సాయిబాబా గుళ్ళను ప్రోత్సహిస్తున్న శక్తులు హిందువులలో ముసలం కలిగించాలని చూస్తున్నారని, అందువలన సాయిబాబాకి ఇక ఎక్కడా గుడి అనేది కట్టగూడదని కూడా శంకరాచార్యులు అన్నారు. 

సాయిబాబా భక్తులు ఈ వ్యాఖ్యలను ఖండిస్తూ తమ ఇష్టదైవమైన సాయిబాబా గురించి అలా మాట్లాడటం తమకు వేదన కలిగిస్తున్నదని అంటున్నారు.

-శ్రీజ