మరీ తలకెక్కిన టెక్నాలజీ

Posted: 06/28/2014 12:30 PM IST

పశ్చిమ బెంగాల్ లో అది బిర్భూమ్ జిల్లా.  డిగ్రీ మొదటి సంవత్సరం పరీక్షలు జరుగుతున్నాయి.  పరీక్ష రాస్తున్న విద్యార్థి పేరు మొహమ్మద్ సైఫ్.  ఏమిటి అతగాడి విశేషం అనుకుంటున్నారా?  పరీక్షకు విగ్గుపెట్టుకుని రావటం!  

సామాన్యంగా విద్యార్థి దశలో ఎవరూ విగ్గులు పెట్టుకోరు.  ఆ అవసరం ఉండదు.  కానీ ఈ విద్యార్థి అవసరం వేరు.  పరీక్షల్లో కాపీ కొట్టటమనేది పాత పద్ధతి.  బ్లూ టూత్ సాయంతో ప్రశ్నలకు జవాబులను తెలుసుకుంటూ రాసుకుంటూ పోవటం చీటింగ్ లో ఆధునిక విధానం.  

రోబో సినిమాలో ఐశ్వర్యరాయ్ ఏకంగా మెడికల్ పరీక్షలనే బ్లూటూత్ సాయంతో రాసేస్తుంది.  ఈ విద్యార్థి కూడా అదే పంథాలో బ్లూటూత్ ని అమర్చుకుని, అది బయటకు తెలియకుండా ఉండటం కోసం ఒక విగ్గు తగిలించేసుకున్నాడు.  అది ఉంగరాలు తిరిగిన అందమైన విగ్గు.  

ఆలోచించాల్సిన అవసరం లేకపోవటంతో తలవంచుకుని బుద్ధిమంతుడిలా పరీక్ష రాసుకుంటూ పోయిన ఆ విద్యార్థిని రెండురోజులు ఎవరూ అనుమానించలేదు.  కానీ మూడోరోజున అతని అదృష్టానికి కాలం తీరింది.  ఇన్వెజిలేటర్ కి అనుమానం వచ్చింది.  తరచి చూస్తే విషయం బయటపడింది.  ఔరా అని ఆశ్చర్యపోతున్న సమయంలో ఆ విద్యార్థి అక్కడిను డి ఉడాయించాడు.  

అయితే ఆ విద్యార్థి ఎవరో తెలుసు కాబట్టి ఫిలాసఫీ హానర్స్ చదువుతున్న సైఫ్ ని సైయంతియా ఆవేదానంద కాలేజ్ ప్రిన్సిపాల్ డిబార్ చేసారు.

-శ్రీజ