మోదీపై వ్యతిరేక పవనాలు ప్రారంభం

Posted: 06/23/2014 04:15 PM IST

(Image source from: bengal assembly resolutioin on railway charges)

కాంగ్రెస్ పార్టీని అడ్రస్ లేకుండా తుడిచిపారేసి, అధికారాన్ని చేజిక్కించుకున్న మోడీ ప్రభుత్వానికి అప్పుడే విమర్శలు రావడం మొదలయ్యాయి. ఇటీవలే రైల్వే ఛార్జీలను భారీగా పెంచడంతో ప్రతిపక్ష పార్టీ నేతలు బీజేపీ పార్టీపై తీవ్రంగా మండిపడుతున్నారు. ఇంతవరకు ఏ ప్రభుత్వం ఇటువంటి నిర్ణయాన్ని తీసుకోలేదని ప్రతిఒక్కరు బీజేపీ పార్టీపై విమర్శించడం మొదలుపెట్టేశారు. ప్రయాణికుల మీద 14.2 శాతం, సరుకుల రవాణా మీద 6.5 శాతం వరకు భారీగా రైల్వే ఛార్జీలను పెంచిన విషయం అందరికీ తెలిసిందే!

తాజాగా ఈ రైల్వే ఛార్జీల పెంపుపై నిరసన వ్యక్తం చేస్తూ... పశ్చిమ బెంగాల్ శాసనసభ వ్యతిరేక తీర్మానం చేసింది. వెంటనే రైల్వే చార్జీల పెంపును ఉపసంహరించాలంటూ రాష్ట్ర శాసనసభా వ్యవహారాల మంత్రి అయిన పార్థ ఛటర్జీ ఈ తీర్మానాన్ని ప్రవేశపెట్టారు. ఇందులో భాగంగా ఆయన మాట్లాడుతూ... ‘‘చరిత్రలో ఎన్నడూలేని విధంగా ఇంతపెద్ద మొత్తంలో రైల్వే ఛార్జీలను ఎవ్వరూ పెంచలేదు. దీంతో సామాన్య ప్రజలపై ఎక్కువ భారం పడుతుంది. కేంద్రప్రభుత్వం తీసుకున్న ఈ నిర్ణయాన్ని మేము ఖండిస్తున్నాం. వీలైనంత త్వరగా తమ నిర్ణయాన్ని ఉపసంహరించుకోవాలని మేము కోరుకుంటూ ఈ తీర్మానాన్ని ప్రవేశపెడుతున్నాం’’ అని ఆయన చెప్పారు.

అంతేకాదు... ప్రతిపక్ష పార్టీ నేతలు కూడా ఈ నిర్ణయంపై తమ అక్కసునంతా వెళ్లగక్కుతున్నారు. ‘‘అధికారంలోకి వచ్చి ఇంకా నెలరోజులయినా కాలేదు.. అప్పుడే ఇంత భారీ నిర్ణయం తీసుకోవడం ఎంతవరకు సమంజసం. ఇది సామాన్య ప్రజలపై భారం కాదా? ఇది ఎంతవరకు న్యాయమంటారు? ఇప్పుడు మోడీ ప్రభుత్వం ఇటువంటి నిర్ణయం తీసుకుంటే... ముందుముందు సామాన్య ప్రజలకు పట్టపగలే చుక్కలు చూడాల్సి వస్తుంది’’ అని తీవ్రంగా విమర్శిస్తున్నారు.