TV9, ABN చానళ్ల వివాదం- కేంద్ర ఆరా

Posted: 06/19/2014 01:06 PM IST

తెలంగాణ వ్యాప్తంగా ఏబీఎన్ ఆంధ్రజ్యోతి, టీవీ9 చానెళ్ల ప్రసారాల నిలిపివేతపై కేంద్ర ప్రభుత్వం స్పందించింది. తెలంగాణలో ఏబీఎన్ ఆంధ్రజ్యోతి, టీవీ9 ప్రసానాలను మూడు రోజులుగా నిలిపి వేసిన విషయం తెలిసిందే. ఈ నేపథ్యంలో కేంద్ర ప్రభుత్వం నేరుగా స్పందించింది.

రెండు టివీ చానళ్ల (TV9, ABN) ప్రసారాలను కేబుల్ ఆపరేటర్లు నిలిపివేయడంపై కేంద్ర సమాచార శాఖ మంత్రి ప్రకాష్ జవదేకర్ రాష్ట్ర ప్రభుత్వాన్ని వివరణ కోరారు.రెండు చానెళ్ల ప్రసారాలు ఎందుకు నిలిపివేశారు? జరిగిన వాస్తవమేమిటి? నివేదిక ఇవ్వాల్సిందిగా తెలంగాణ రాష్ట్ర ప్రభుత్వ ప్రధాన కార్యదర్శి రాజీవ్ శర్మకు ఆయన ఆదేశాలు జారీ చేశారు.. కేబుల్ ఆపరేటర్లు, కేబుల్ వ్యవస్థ కేంద్రం పరిధిలోనిదని, కేబుల్ చట్టాలను ఎలా ఉల్లంఘిస్తారని తెలంగాణ సీఎస్ను ప్రకాశ్ జవదేకర్ ప్రశ్నించినట్లుగా తెలుస్తోంది. నిబంధనలు ఉల్లంఘిస్తే కఠిన చర్యలు తప్పవని ఆయన హెచ్చరించారట. కేబుల్ ఆపరేటర్లు చట్టాన్ని ఉల్లంఘించినట్లు రుజువు అయితే వాళ్లపై చర్యలు తప్పవని, కాబట్టి వాస్తవ పరిస్థితిని నివేదిక రూపంలో అందజేయాలని జవదేకర్ ఆదేశించారు.

జానారెడ్డి:

టీవీ9 చానెల్ తెలంగాణ శాసనసభను వ్యంగ్యంగా, అవమానించేలా ప్రసారాలు చేయడం విచాకరమని జానారెడ్డి అన్నారు. దీన్ని తాము అసెంబ్లీలో ముక్తకంఠంతో ఖండించామని గుర్తుచేశారు. అయితే, టీవీ9పై చర్య తీసుకునే అంశం స్పీకర్ పరిశీలనలో ఉండగానే.. దీనితో ఎలాంటి సంబంధం లేని ఏబీఎన్ ప్రసారాలను నిలిపివేయడమేమిటని జానా ప్రశ్నించారు. ఇది.. జడ్జిమెంట్ రాకముందే, బెయిల్ మీద ఉన్న వ్యక్తిపై చర్య తీసుకున్నట్లుగా ఉందని వ్యాఖ్యానించారు. "ఎంఎస్వోల సంఘం, కేబుల్ ఆపరేటర్ల సంఘాలు కలిసి ఈ నిర్ణయం తీసుకున్నట్లు పేపర్లో వార్తలు చూశాను. వారు స్వయంగా ఈ నిర్ణయం తీసుకుని ఉంటే సరే.

కానీ నిర్ణయం తీసుకునే ముందు ఆయా ప్రసార మాధ్యమాల యాజమాన్యాలతో చర్చించి ఉండాల్సింది. ఇరు వ్యవస్థల మధ్య తలెత్తిన అపోహలు, వివాదాలు పరిష్కరించుకుని ఉంటే బాగుండేది. అప్పుడే ఎంఎస్వోల నిర్ణయాన్ని ప్రజలు హర్షించేవారు. కానీ అధికార ఒత్తిడి వల్లనో, ప్రోద్బలం వల్లనో ఈ నిలిపివేత నిర్ణయం తీసుకుని ఉన్నట్లయితే... అది పూర్తిగా ప్రతికార చర్య, ప్రతీకార దాడిగా, పత్రికా స్వేచ్ఛను హరించే విధానంగా ప్రజలు అనుకుంటారు '' అని జానారెడ్డి స్పష్టం చేశారు.