ఇక సిఎం దుమ్మదులపటమే మాపని? టీ-లీడర్స్

Posted: 06/18/2014 08:06 AM IST

Telangana congress leaders fight on trs government

సార్వత్రిక ఎన్నికల ఫలితాలపై తెలంగాణ కాంగ్రెస్ నిర్వహించిన సమీక్షా సమావేశంలో పార్టీ నాయకులు కస్సుబుస్సులాడారు. తెలంగాణ రాష్ట్రాన్ని ఏర్పాటు చేసినా పార్టీని ప్రజలు ప్రతిపక్షంలో కూర్చోబెట్టారని నాయకులు ఆవేదన చెందారు. టీపీసీసీ అధ్యక్షుడు పొన్నాల లక్ష్యయ్య మాట్లాడుతూ ..ఎన్నికల్లో టీఆర్‌ఎస్ ఆచరణ సాధ్యం కాని హామీలిచ్చి అధికారంలోకి వచ్చిందని, ఈ హామీలన్నీ అమలు చేసేలా ప్రభుత్వం మీద ఒత్తిడి తేవాలని పొన్నాల లక్ష్మయ్య దిశానిర్ధేశం చేశారు.

ఇచ్చిన హామీల అమలుకు సంబంధించి కార్యకర్తలు వాచ్‌డాగ్‌లా వ్యవహరించాలని సూచించారు. పార్టీకి అనుబంధంగా ఉన్న 13 సంఘాల నేతలతో గాంధీభవన్‌లో పార్టీ పరిస్థితిని విడివిడిగా సమీక్షించారు. ఏఐసీసీ కార్యదర్శి, రాష్ట్ర వ్యవహారాల సహాయ ఇన్‌చార్జి రామచంద్ర కుంతియా, టీపీసీసీ కార్యనిర్వాహక అధ్యక్షుడు ఉత్తమ్‌కుమార్‌రెడ్డి సమీక్షలో పాల్గొన్నారు. ఆయా వర్గాలకు ఇచ్చిన హామీలను పరిశీలించేందుకు అనుబంధ సంఘాల నేతలకు టీఆర్‌ఎస్ మేనిఫెస్టో ప్రతులను అందజేశారు.

గతంలో కాంగ్రెస్ అమలు చేసిన సంక్షేమ కార్యక్రమాలు కొనసాగేలా చూడడంతో పాటు టీఆర్‌ఎస్ ఇచ్చిన హామీలు నేరవేరే విధంగా ప్రజల పక్షాన నిలబడాలని సూచించారు. ఓటమితో కుంగిపోకుండా పార్టీకి పూర్వవైభవాన్ని తెచ్చేందుకు అనుబంధ సంఘాలు కృషిచేయాలని సూచించారు. గ్రామస్థాయి నుంచి పార్టీని పటిష్టపరచాలన్నారు.

తమ పార్టీకి ఉన్న 13 అనుబంధ విభాగాలతో సమీక్షా సమావేశాన్ని నిర్వహించామని చెప్పారు. ప్రభుత్వం చేపడుతున్న కార్యక్రమాలను ఎప్పటికప్పుడు గమనిస్తూ, ఎక్కడైనా లోపాలు ఉంటే ప్రజల సహకారంతో ఎండగట్టాలని సూచించినట్లు తెలిపారు. పత్రికా స్వేచ్ఛను అడ్డుకోరాదని పొన్నాల డిమాండ్ చేశారు. కొంత మంది కొన్ని ఛానళ్ళను నిలిపి వేయాలని చెప్పడం సమంజసం కాదని అన్నారు.

తెలంగాణ లో ప్రతిపక్షంలో కూర్చున్న కాంగ్రెస్ పార్టీ ఇక నుండి ..కారు దుమ్మదులపటమే మన పని అని తెలంగాణ కాంగ్రెస్ నేతలు నిర్ణయం తీసుకున్నారు. కేసిఆర్ సర్కార్ పై ..పొన్నాల సైన్యం పోరాటం చేయటానికి సిద్దమవుతుంది.