సరిహద్దులో మనవాళ్లు దీటుగా జవాబిస్తారు- అరుణ్ జైట్లీ

Posted: 06/14/2014 05:50 PM IST

ఎల్ ఓ సి నియమాలను పాకిస్తాన్ ఉల్లంఘించినట్లయితే మన జవాన్లు ధీటుగా జవాబు చెప్తారంటూ డిఫన్స్ మంత్రి అరుణ్ జైట్లీ ఈరోజు జమ్మూకాశ్మీర్ పర్యటనలో అన్నారు.  

డిఫెంస్ మినిస్టర్ గా పదవీ స్వీకారం చేసిన తర్వాత మొదటిసారి జమ్మూకాశ్మీర్ పర్యటనకు వెళ్ళిన అరుణ్ జైట్లీని మీడియా ప్రతినిధులు పూంచ్ లో పాక్ సైనికుల కాల్పుల గురించి అడగ్గా ఆయన పై విధంగా స్పందించారు.  రెండు రోజుల పర్యటనలో జమ్మూ కాశ్మీర్ వెళ్ళిన అరుణ్ జైట్లీ భద్రతా సంబంధిత విషయాల మీద రాష్ట్ర ప్రభుత్వంతో చర్చలు సాగిస్తారు.  

రాజ్ భవన్ లో రాత్రికి బస చెయ్యబోతున్న అరుణ్ జైట్లీ అక్కడే మీడియా ప్రతినిధులతో సమావేశమయ్యారు.  ఆర్మీ ఛీఫ్ జనరల్ బిక్రమ్ సింగ్ తో పాటు గా జమ్మూ కాశ్మీర్ పర్యటనలో ఉన్న ఆయన భద్రత మొదలైన విషయాల మీద గవర్నర్ ఎన్ఎన్ వోహ్రా, ముఖ్యమంత్ ఒమర్ అబ్దుల్లాలతో భేటీ అవుతారు.

శుక్రవారం పూంచ్ సెక్టార్ లో పాక్ సైనికులు భారత్ పోస్ట్ ల మీద భారీగా కాల్పులు జరిపారు.  దానికి భారత్ సైనికులు కూడ ధీటుగా జవాబిచ్చారు.  అయితే పాకిస్తాన్, భారత్ లమధ్య సంబంధాలు నెలకొల్పటానికి సరిహద్దుల్లో శాంతి భద్రతలు ముఖ్యమని అన్న మాటలను ఆ కాల్పులు గుర్తు చేస్తున్నాయా అన్నట్లుగా సరిగ్గా రక్షణ మంత్రి జమ్మూ కాశ్మీర్ కి వెళ్ళటానికి ముందు రోజునే పాక్ సైనికులు కాల్పులు జరపటాన్ని ముఖ్యమంత్రి ఒమర్ అబ్దుల్లా ప్రస్తావిస్తూ ఇది కేవలం కాకతాళీయమా అన్నారు.  

ఏప్రిల్ నుంచి మే అర్థభాగం వరకు పాక్ తరఫు నుంచి 19 సార్లు ఎల్ ఓ సి ఉల్లంఘనలు జరిగాయి.  

అయితే శుక్రవారం భారత సేనలు దీటుగా ప్రతిఘటించాయని, ఇక ముందు కూడా మనవాళ్ళు పాక్ సైనికుల ఉల్లంఘనలకు సరైన రీతిలో జవాబిస్తారని అరుణ్ జైట్లీ అన్నారు.

-శ్రీజ