5 లక్షల ఆదాయం వరకు పన్ను ఉండబోదు

Posted: 06/14/2014 09:34 AM IST

ఆదాయ పన్ను కోసం ఆదాయ పరిమితిని 2 లక్షల నుంచి 5 లక్షల వరకు పెంచే దిశగా చర్చలు జరుగుతున్నాయి.  

ఇది వచ్చే నెలలో పార్లమెంట్ లో ప్రవేశపెట్టబోతున్న వార్షిక బడ్జెట్ లో చోటుచేసుకున్ అవకాశం పూర్తిగా ఉందని విశ్వసనీయ వర్గాల నుండి వచ్చిన సమాచారం.

జీతాల మీదనే ఆధారపడేవారికి ఇది ప్రధాన మంత్రి నరేంద్ర మోదీ వారికిచ్చిన వరంగా భావించవచ్చు.  దీనివలన ప్రభుత్వ ఆదాయం మీద తాత్కాలికంగా గండిపడ్డా, దీనివలన వేతనజీవులకు ఎక్కువగా ఖర్చుపెట్టుకునే అవకాశం లభిస్తుంది.  అలా వ్యయాన్ని పెంచటం వలన దేశంలో వ్యాపార రంగం ఆర్థికంగా పుంజుకునే అవకాశం ఉంది.  పన్ను కట్టే బదులు ఆ సొమ్ముని వినియోగించుకోవటం ద్వారా వ్యాపారం అభివృద్ధి చెందటానికి వెసులుబాటు కలుగుతుంది.

దీని వలన రాజకీయంగా ఎలాగూ మోదీ ప్రభుత్వానికి పరపతి పెరుగుతుంది.  కాబట్టి మోదీ ప్రభుత్వం కేంద్ర ప్రత్యక్ష పన్నుల బోర్డుని ఈ విషయంలో అభిప్రాయాన్ని తెలియజేయమని కోరినట్లుగా సమాచారం.  

ఇక ఆదాయపన్ను నుంచి సెక్షన్ 80 సి కింద ఉన్న మొత్తం, బీమాలు, పిఎఫ్ లు, పొదుపు పథకాలు ఇలా ఎందులో పెట్టుబడి పెట్టినా లక్షరూపాయలకే పరిమితమైయ్యుంది.  దీన్ని 3 లక్షల వరకు పెంచటానికి ఆర్థిక నిపుణులు కూడా సలహా ఇస్తున్నారు.  అలాగే ఆరోగ్య బీమా ప్రీమియం మీద కూడా పన్ను మినహాయింపును 5 వేల వరకు పెంచే అవకాశం కూడా కనిపిస్తోంది.

ఎన్నికల ముందు యుపిఏ ప్రభుత్వం ప్రవేశపెట్టిన బడ్జెట్ తో పోలిస్తే కొత్త ప్రభుత్వం బడ్జెట్ ప్రజారంజకంగా ఉంటుందని, ఎక్కువమందికి ప్రయోజనకారిగా ఉంటూనే దేశాభివృద్ధికి తోడ్పడే విధంగా రూపుదిద్దుకుంటోందని సమాచారం.

-శ్రీజ