తెలంగాణాలో తెదేపా అధికారం ఖాయం- బాలయ్య!

Posted: 05/28/2014 12:47 PM IST

తెలుగు దేశం పార్టీ రెండవ రోజు నిర్వహించిన మహానాడులో మాట్లాడిన బాలకృష్ణ భౌగోళికంగా విడిపోయినా ఇరు రాష్ట్రాలలోను ఉన్నది తెలుగువారేనని, అందువలన భవిష్యత్తులో తెలంగాణాలో కూడా తెలుగుదేశం అధికారంలోకి రావటం ఖాయమని అన్నారు.  

తెలుగు ప్రజల ఆత్మగౌరవాన్ని కాపాడుకోవటానికే స్వర్గీయ ఎన్టీఆర తెలుగు దేశం పార్టీని ఏర్పాటు చేసారని చెప్పిన బాలకృష్ణ ఆయన ఎన్నో సంక్షేమ పథకాలను ప్రవేశపెట్టారని గుర్తుచేసారు.  చంద్రబాబు మీద అపారమైన నమ్మకంతోనే తెలుగు ప్రజలు ఆయనకు అధికారాన్ని కట్టబెట్టారని అన్నారాయన.

ఇరు ప్రాంతాలలోను ఉన్నది తెలుగు ప్రజలే కనుక తెలుగు ప్రజల ఆత్మగౌరవం కోసం నెలకొల్పిన తెలుగు దేశం పార్టీకి తెలంగాణాలోనూ ఆదరణ లభిస్తుందని బాలయ్య అన్నారు.

తనని గెలిపించిన హిందూపురం ప్రజలకు కృతజ్ఞతలు తెలుపుకున్న బాలయ్య ఎన్నికల సందర్భంలో హిందూపురం ప్రజలకు తాను ఇచ్చిన హామీలను, రాష్ట్రవ్యాప్తంగా చంద్రబాబు ఇచ్చిన హామీలను నెరవేరుస్తామని తెలియజేసారు.  మహానాడుకి విచ్చేసిన కార్యకర్తలకు కూడా ఆయన కృతజ్ఞతలు తెలియజేసారు.

-శ్రీజ