ఏరులై పారుతున్న మద్యం, విచ్చలవిడిగా నోట్ల కట్టల పంపిణి

Posted: 05/07/2014 03:42 AM IST

Ap highest in money and alcohol distribution for elections

ఆంధ్రప్రదేశ్‌లోని 25 ఎంపీ స్థానాలు, 175 అసెంబ్లీ స్థానాలకు మంగళవారంనాడు ఎన్నికలు జరగనున్నాయి. దేశవ్యాప్తంగా మొత్తం ఏడు రాష్ట్రాల్లోని 64 పార్లమెంటరీ స్థానాలకు, 181 అసెంబ్లీ స్థానాలకు బుధవారం పోలింగ్ జరగబోతున్నది. బరిలో ఉన్న ప్రముఖుల్లో రాహుల్‌గాంధీ (అమేఠీ), క్రికెటర్ మహ్మద్ కైఫ్ (ఫూల్‌పూర్), రాంవిలాస్ పాశ్వాన్ (హజీపూర్), పలువురు కేంద్ర మంత్రులు ఉన్నారు. తొమ్మిదో దశ మే 12న జరగనుంది.

ఆంధ్ర ప్రదేశ్‌లో నోట్లు కట్టలు కట్టలుగా బయటకువస్తున్నాయి. మద్యం ఏరులై పారుతోంది. దేశం మొత్తం మీద దొరికిన నగదులో సగానికి పైగా ఆంధ్రప్రదేశ్‌లోనే దొరకడం ఢిల్లీలో ఎన్నికల కమిషన్‌ను సైతం విస్మయానికి గురి చేసింది. అభ్యర్ధుల తరపున పంపిణీ అవుతున్న నకిలీ మద్యం సేవించి కొన్ని చోట్ల కొందరు మరణించడం కూడా తీవ్ర ఆందోళన కలిగిస్తున్నది.

దేశవ్యాప్తంగా ఎన్నికల తనిఖీల్లో పెద్దఎత్తున నగదు, మద్యాన్ని స్వాధీనం చేసుకున్నట్లు ఎన్నికల సంఘం అధికారులు తెలిపారు. ఇందులో ఆంధ్రప్రదేశ్‌దే అగ్రస్థానమని ఈసీ పేర్కొంది. మే 2వ తేదీ నాటికి రూ.283 కోట్ల నగదును పట్టుకోగా, అందులో రూ.131కోట్లు ఆంధ్రప్రదేశ్‌లోనే స్వాధీనం చేసుకున్నట్లు తెలిపింది. దేశవ్యాప్తంగా 2.13 కోట్ల లీటర్ల మద్యాన్ని స్వాధీనం చేసుకోగా ఏపీలో 1.34 లక్షల లీటర్ల మద్యాన్ని సీజ్ చేసినట్లు తెలిపారు.

పట్టుబడుతున్న నగదులో నకిలీ కరెన్సీ ఎక్కువగా ఉంటోందని ఈసీ వర్గాలు వెల్లడించాయి. బుధవారం ఎన్నికలు జరగనున్న సీమాంధ్రలో రూ.4 లక్షల విలువైన రెండు లారీల చీరల లోడ్‌ను స్వాధీనం చేసుకున్నామని ఈసీ తెలిపింది.