బెదిరిస్తున్నారు.. జగన్ అంటే భయం లేదు

Posted: 05/03/2014 08:00 AM IST

"కొందరిపై నేను విమర్శలు చేస్తున్నానని రెండు రోజులుగా బెదిరింపు కాల్స్ వస్తున్నాయి. వీటికి నేను బెదిరేదిలేదు. నాకు భయం అంతకంటే లేదు'' అని జనసేన అధినేత, ప్రముఖ సినీ నటుడు పవన్‌కల్యాణ్ అన్నారు. ఎన్నికల ప్రచారంలో భాగంగా ఉభయగోదావరి జిల్లాల్లోని నరసాపురం, తణుకు, కాకినాడ, రాజమండ్రిలలో జరిగిన బహిరంగ సభల్లో పవన్ కల్యాణ్ పాల్గొన్నారు,జనం పడుతున్న కష్టాలను చూసే తాను బయటకు వచ్చి జనసేన పార్టీ పెట్టానని చెప్పారు.

జగన్ అంటే తనకు భయం లేదని పవన్ స్పష్టం చేశారు. "జగన్ అంటే భయంలేదు, జగన్ అంటే శత్రుత్వంలేదు. దోపిడీకి వ్యతిరేకంగానే పోరాటం చేస్తున్నాను. జగన్ దోపిడీ చేసి జైలుకు వెళ్ళాడు. నేను మాత్రం దోపిడీని ఎదిరించడానికి, సీమాంధ్రను రక్షించడానికి జైలుకు వెళ్లడానికెనా సిద్ధమే''అని అన్నారు. .

బెదిరింపులేకాదు, తనపై దాడులకు కూడా దిగే అవకాశాలు ఉన్నాయని ఆయన అనుమానం వ్యక్తం చేశారు.తుమ్మితే పోయే ప్రాణాలంటే తనకు లెక్క లేదని పవన్ ఉద్వేగంగా వ్యాఖ్యానించారు. తనపై ఎవరైనా దాడులు చేస్తే..దౌర్జన్యాలు, తుపాకులు ఉండవని.. భరతమాతకు జై అంటూ సమూహంగా నడుచుకువెళ్తానని చెప్పారు. తనను బెదిరించేవారు ఆ దుమ్ముధూళికి భస్మమైపోతారని హెచ్చరించారు.

ప్రశ్నించినందుకే కేసీఆర్ తనను తిడుతున్నారని మరి తెలంగాణను దోచేసిన వైఎస్ గురించి ఆయన ఎందుకు మాట్లాడరని ప్రశ్నించారు. వైఎస్ రాజశేఖరరెడ్డి భూ దాహానికి కాకినాడ సెజే నిదర్శనమని ధ్వజమెత్తారు. వైసీపీ భూకబ్జాదారులను చూస్తుంటే 'అది కడుపా..కంబాల చెరువా' అర్థం కావడం లేదన్నారు. అవినీతిపరుల దోపిడీ ఇలాగే కొనసాగితే సీమాంధ్రలో ఖలిస్థాన్ ఉద్యమం వస్తుందని హెచ్చరించారు. "భగవంతుని పేరు చెప్పి దోచుకుంటున్న వారిని చూసి, ప్రజాధనాన్ని దోపిడీ చేస్తున్న వారిని చూసి, భూ కబ్జాదారులను చూసి తట్టుకోలేకపోయాను. అటువంటి అవినీతిపరులను ప్రజాజీవితం నుంచి పక్కకు నెట్టాలనే సంకల్పంతోనే పార్టీ స్థాపించాను.

నాకు జగన్‌లా లక్షల కోట్లు సంపాదించాలని లేదు. పార్టీలను అడ్డుకుని పదవులను పొందాలని లేదు. ప్రజా సమస్యల పరిష్కారం కోసం ప్రభుత్వాలను ప్రశ్నించడానికే పార్టీ పెట్టాను. ప్రజా హక్కులను కాలరాస్తే నాలో ఆవేశం రగులుతుంది. దేశం, సమాజం కోసమే వచ్చాను. అందుకే నా సినిమాల్లో దేశభక్తి పాటలు ఉంటాయి'' అని వివరించారు.