కాలం చెల్లిన 13వ శాసనసభ

Posted: 04/26/2014 10:33 AM IST

అఖండ ఆంధ్రప్రదేశ్ లో రెండు నెలల పాటు విధించిన రాష్ట్రపతి పాలన గడువు ముగియనుండటంతో ఆ సమయం అయిపోగానే సుప్త చేతనావస్థలో ఉన్న శాసన సభను పునరుద్ధరించవలసి వుంటుంది కాబట్టి, వెదురే లేకపోతే వేణువే మోగదన్న సామెతను అనుసరించి, అసలు శాసన సభే లేకపోతే పునరుద్ధరించే పనే ఉండదని అభిప్రాయపడ్డ కేంద్ర ప్రభుత్వం 13 వి శాసనసభను రద్దు చెయ్యటానికి నిర్ణయించుకుంది.  దానితో మరోసారి రాష్ట్రపతి పాలనను విధించటానికి మార్గం సుగమం అవుతుంది. 

ఈ మేరకు కేంద్ర మంత్రి వర్గం సమావేశంలో తీసుకున్న నిర్ణయాన్ని అనుసరిస్తూ రాష్ట్రపతి పాలనను కొనసాగించవలసిందిగా రాష్ట్రపతి ప్రణబ్ ముఖర్జీకి సిఫారసు చెయ్యటం జరిగింది. 

అంతకు ముందు రాష్ట్రపతి పాలనను రద్దు చేసి మరోసారి తాజాగా విధిస్తే ఎలా ఉంటుంది అన్న చర్చ వచ్చింది.  కానీ మొదటి సారి విధించిన రాష్ట్రపతి పాలనకే పార్లమెంట్ ఆమోదం లేకుండా మరోసారి విధించటానికి రాష్ట్రపతి సుముఖంగా లేరని తెలిసింది.  దానికంటే అసలు శాసనసభనే రద్దు చేస్తే దాన్ని పునరుద్ధరించే ప్రసక్తే ఉండదు కదా అన్న ఆలోచన శ్రేయస్కరంగా కనిపించింది. 

-శ్రీజ