నంద్యాల విక్టరీ.. అంతా బాబు చలవే!

Posted: 08/29/2017 06:15 PM IST

రాజకీయానుభవం లేకపోయినా కేవలం టీడీపీ అధినేత చంద్రబాబు పేరు మూలంగానే తాను నంద్యాల ఉప ఎన్నికల్లో గెలిచానని నంద్యాల ఎమ్మెల్యే భూమా బ్రహ్మానందరెడ్డి తెలిపారు. తమ కుటుంబం ఎప్పుడూ చంద్రబాబుకు రుణపడి ఉంటుందని ఆయన అంటున్నారు. మంగళవారం మీడియా ఇంటర్వ్యూలో ఆయన మాట్లాడుతూ... తన తండ్రి లేకపోయినా బాబాయి భూమా నాగిరెడ్డి, పిన్ని శోభా నాగిరెడ్డి చేతుల్లో తాను పెరిగిన విషయాన్ని ఈ సందర్భంగా గుర్తు చేసుకున్నారు.

తమ గెలుపు సీమ రాజకీయాల్లో మార్పు తెస్తుందని, టీడీపీ హయాంలో జరుగుతున్న అభివృద్ధి పనులు ప్రజలను ఆలోచింపజేస్తున్నాయని అన్నారు. నంద్యాలలో ఫ్యాక్షనిజం గత చరిత్ర అని, ఇప్పుడు లేదని చెప్పిన బ్రహ్మానందరెడ్డి, టీడీపీ వైపు యువత, మహిళలు అధిక సంఖ్యలో ఆకర్షితులవుతున్నారని అన్నారు. రాబోయే రోజుల్లో నంద్యాల పురోగతికి పాటుపడతానని చెప్పుకొచ్చారు.