జైరాంపై విరుచుకుపడ్డ మంత్రి కేటీఆర్

Posted: 07/25/2017 03:22 PM IST

అన్ని రంగాల్లో తెలంగాణ ముందుకు సాగుతోందని, అభివృద్ధి కంటగింపుగా మారిన కొందరు అభూత కల్పనలను ప్రచారం చేస్తూ దివాళాకోరు రాజకీయాలకు పాల్పడుతున్నారంటూ మంత్రి కేటీఆర్ తీవ్ర స్థాయిలో ధ్వజమెత్తాడు. కాంగ్రెస్ సీనియర్ నేత జైరామ్ రమేష్ చేస్తున్నదంతా దుష్ప్రచారమేనని మండిపడ్డాడు.

సంక్షేమ రంగానికి స్వర్ణయుగంలా టీఆర్ఎస్ పాలన కొనసాగుతోందని, కేసీఆర్ స్వయం పర్యవేక్షణలో తమ ప్రభుత్వంలో అన్ని పనులు సవ్యంగా జరుగుతున్నాయిని కేటీఆర్ చెబుతున్నాడు. తమకు భవిష్యత్తు ఉండదనే భయం కాంగ్రెస్ నేతలకు పట్టుకుందని ఎద్దేవా చేశారు. ‘‘జైరాం రమేష్ పెద్ద మేధావినని చెప్పుకుంటుంటాడు. కానీ, ఆయన ఏం మేధావో తనకు అర్థం కావడం లేదు. పోలీస్ డిపార్ట్ మెంట్ కోసం కొన్న వాహనాలను షోరూంల నుంచి కొనుగోలు చేయలేదని, డైరెక్ట్ గా టయోటా కంపెనీ నుంచే కొనుగోలు చేశామని చెప్పారు. ఒక్క టయోటా వాహనాలనే కాకుండా టాటా సుమోలు, మహీంద్రా బొలెరోలు, మారుతి స్విఫ్ట్ డిజైర్, ఐషర్ బస్సులు, తదితర వాహనాలను కూడా కొన్నామని, ఆ విషయం వారికి తెలీనట్లు ఉందని చెప్పాడు.

 

ఇక తనకు ఏడెనిమిదేళ్ల క్రితం ట్రాక్టర్లకు సంబంధించిన ఓ వ్యాపారం ఉండేదని... మంత్రి కాకముందే దాన్ని మూసేశానని కేటీఆర్ చెప్పాడు. బోడిగుండుకు, మోకాలికి ముడి పెట్టే ప్రయత్నం చేస్తే... వాళ్లకు దణ్ణం పెట్టడం తప్ప తాము చేయగలిగింది ఏమీ లేదన్నాడు. వెంకయ్యనాయుడి కుమారుడికి చెందిన హర్షా టయోటా షోరూంల నుంచి టెండర్లు లేకుండా భారీ ఎత్తున వాహనాలను కొనుగోలు చేశారంటూ జైరాం ఆరోపించిన విషయం తెలిసిందే. ఆ ఆరోపణలను వెంకయ్య నాయుడు కూడా గతంలోనూ, తాజాగానూ ఖండించాడు కూడా.