నాకెలాంటి సంబంధం లేదు : నీతూ

Posted: 05/07/2015 06:28 PM IST

Neetu agarwal released from kurnool jail mastan vali sandalwood smugling

టాలీవుడ్ రంగుల ప్రపంచంలో తన అదృష్టాన్ని పరీక్షించుకోవాలని ఎక్కడి నుంచో వచ్చిన నటి నీతూ అగర్వాల్... చివరికి ‘ఎర్ర’ స్మగ్లింగ్ లో కూరుకుపోయి తన కెరీర్ ని నాశనం చేసుకుంది. తన ఆశల హరివిల్లులో విహరిద్దామని కోరికలు కనేలోపే మస్తాన్ వలీ చీకటి రూపంలో ఈమెకి పరిచయం అయ్యాడు. అంతే! అక్కడి నుంచి ఈమె జీవితంలో వెలుగే కరువయ్యింది. కనీసం స్వేచ్ఛగా శ్వాస తీసుకోవాలని నీతూ భావించినా.. ఆ చీకటి గదిలో కిటికీలు లేకుండాపోయాయి. అటువంటి జీవితాన్ని అనుభవించాల్సి వచ్చింది.

దీంతో చేసేదేమీ లేక.. ఆ జీవితాన్ని ఆస్వాదిస్తూ కెరీర్ ని ముందుకు నెట్టుకొచ్చే ప్రయత్నం చేసింది. అయితే.. ఇంతలోనే ‘ఎర్ర’ మసి అంటుకోవడంతో జైలుపాలు కావల్సి వచ్చింది. చివరికి ఈమె బెయిల్ మీద విడుదలయ్యింది. కర్నూలు జైలు నుంచి గురువారం రిలీజ్ అయిన అనంతరం ఈమె మీడియాతో మాట్లాడింది. తనకు ఈ స్మగ్లింగ్ కేసుతో ఎటువంటి సంబంధం లేదని.. తన జీవితాన్ని నాశనం చేసిన మస్తాన్ వలీతో తాడోపేడో తేల్చుకుంటానని ఆగ్రహం వెళ్లగక్కింది. అతడు తనను నమ్మించి, నిండా మోసం చేశాడని ఆమె ఆవేదన వెళ్లగక్కింది. ఈ క్రమంలోనే కొన్ని ఆసక్తికరమైన విషయాలనూ ఆమె వెల్లడించింది.

నీతూ మాట్లాడుతూ.. ఎర్రచందనం స్మగ్లింగ్ కేసుతో తనకు ఎలాంటి సంబంధం లేదని స్పష్టం చేసింది. మస్తాన్ వలీ ఓ రియాల్టర్, నిర్మాతగానే తనకు తెలుసునని ఆమె తెలిపింది. అంతకు మించి అతడి గురించి తనకేమీ తెలియదంది. ఇద్దరం కలసి ప్రేమ ప్రయాణం చిత్రంలో కలిసి నటించామని... ఆ తర్వాత తమ మధ్య ప్రేమ చిగురించి వివాహం చేసుకున్నామని వెల్లడించింది. అయితే అతడు ఎక్కడి నుంచి వచ్చాడు... సినీ రంగానికి ఎలా వచ్చాడు... అనే అంశాలపై మస్తాన్ వలీని తాను ఏ రోజు ప్రశ్నించలేదని తెలిపింది.

ఏటీఎమ్ కార్డు కావాలని ఓ భర్తగా మస్తాన్ అడిగాడని.. భార్యగా తాను ఇచ్చానని ఆమె చెప్పింది. తన ఏటీఎం కార్డును మస్తాన్ దుర్వినియోగం చేశాడని ఆరోపించింది. అనవసరంగా తనను ఈ కేసులో ఇరికించారని ఆమె ఆవేదన వ్యక్తం చేసింది. పోలీసులు ఆరోపిస్తున్నట్లు తాను ఎవరిని మోసం చేయలేదని చెప్పింది. తాను ఏ తప్పు చేయలేదని... భవిష్యత్తులో తప్పకుండా సినిమా అవకాశాలు వస్తాయని నీతూ అగర్వాల్ ఆశాభావం వ్యక్తం చేశారు.