ఏం నాయనా.. బ్లాక్ మెయిల్ చేస్తున్నారా?

Posted: 05/08/2015 12:56 PM IST

గత రెండురోజుల నుంచి ఇటు తెలంగాణ, అటు ఆంధ్రప్రదేశ్ రాష్ట్రాల్లో ఆర్టీసీ కార్మికులు సమ్మె నిర్వహించడంతో బస్సులన్నీ ఆగిపోయిన విషయం తెలిసిందే! దీంతో ప్రయాణీకులు తీవ్ర ఇబ్బందులు ఎదుర్కొంటున్నారు. ఈ క్రమంలోనే రెండు రాష్ట్రాల ప్రభుత్వాలు తర్జనభర్జన పడుతున్నాయి. ఆర్టీసీ కార్మికులు అడుగుతున్న జీతభత్యం మరీ ఎక్కువగా వుండటంతో.. అందుకు అంగీకారం తెలిపేందుకు రెండు ప్రభుత్వాలు ముందుకు రావడం లేదు. కార్మికులు తమ సమ్మెను విరమించుకోవడానికి సిద్ధం కావడం లేదు. ఈ విషయాన్నే పురస్కరించుకుని ఏపీ సీఎం చంద్రబాబు నాయుడు తనదైన శైలిలో వ్యాఖ్యలు సంధించారు.

ఏ డిమాండైనా న్యాయమైనదనిపించి, నెరవేర్చగలిగేదిగా వుంటే దాన్ని నెరవేర్చేందుకు తాము సిద్ధమేనని బాబు పేర్కొన్నారు. అలాకాకుండా గొంతెమ్మ కోరికలు కోరుతూ, బ్యాక్ మెయిల్ చేయాలని చూస్తే సహించేది లేదని ఆయన వ్యాఖ్యానించారు. కొందరు నాయకుల సూచనల మేరకే ఈ సమ్మె జరుగుతోందని ఆయన ఆరోపించారు. విద్యార్థుల కోసం ఏర్పాటు చేసిన బస్సులను కూడా ఆదుకుంటారా? అని ఆగ్రహంతో ప్రశ్నించారు. ఏకపక్ష నిర్ణయాలు తీసుకోకూడదని, తాను మానవత్వంతో ఆలోచించే నిర్ణయాలు తీసుకుంటానని తెలిపారు. మరీ ఇంత ఫిట్ మెంట్ కావాలని డిమాండ్ చేస్తూ బ్లాక్ మెయిల్ చేస్తే లొంగే సమస్యే లేదని చంద్రబాబు హెచ్చరించారు.