భారీ వర్షం-కిరణకు బాబు కొత్త డిమాండ్

Posted: 10/25/2013 05:51 PM IST

Chandrababu fire on cm kiran with heavy flood

గత నాలుగు రోజులుగా రాష్ట్రంలో కురుస్తున్న భారీ వర్షం పై .. చంద్రబాబు మండిపడ్డారు. అంటే వర్షం మీద కాదులేండి.. కాంగ్రెస్ ప్రభుత్వం చంద్రబాబు నాయుడు తీవ్రస్థాయిలో ద్వజమెత్తారు. రాష్ట్ర ముఖ్యమంత్రి నల్లారి కిరణ్ కుమార్ రెడ్డి ఏం చేస్తున్నారని చంద్రబాబు నిలదీశారు. భారీ వర్షాలకు మార్కెట్ యాడ్ లలో తడిసిపోయిన ధాన్యాన్ని ప్రభుత్వం కొనుగోలు చేయాలని చంద్రబాబు నాయుడు ప్రభుత్వాన్ని డిమాండ్ చేశారు. భారీ వర్షాలు కురుస్తున్నా ప్రభుత్వాలు సహాయం అందించడం లేదని ఆయన కేంద్ర, రాష్ట్ర ప్రభుత్వాలపై మండిపడ్డారు. రాష్ట్రంలో కురుస్తున్న భారీ వర్షాల నేపథ్యంలో ఆయన పార్టీ కార్యాలయంలో ఈరోజు మాట్లాడారు వర్షానికి పాడైపోయిన పత్తి, మొక్కజొన్న, వరి పంటలను ప్రభుత్వం కొనుగోలు చేసి రైతులను ఆదుకోవాలని ఆయన డిమాండ్ చేశారు.

వరదల కారణంగా పంట నష్టపోయిన రైతులను ఆదుకోవడంలో ప్రభుత్వం విఫలమైందని ఆయన విమర్శించారు. రాష్ట్రంలో ప్రజలు వరద బారిన పడి కొట్టుమిట్టాడుతుంటే కాంగ్రెస్ పార్టీ నేతలు మాత్రం ఈ నెల ఆరునుంచి రచ్చబండ కార్యక్రమానికి ఏర్పాట్లు చేస్తుండడం సిగ్గుచేటని ఆయన అన్నారు. ప్రజలకు సహాయ చర్యలను నామమాత్రంగా అందిస్తోందని అన్నారు. కృష్ణా జిల్లా వరదల్లో 1000 కోట్ల సహాయం అందిస్తామని ప్రకటించిన కేంద్రం 50 కోట్లు ఇచ్చి చేతులు దులుపుకుందని విమర్శించారు. నీలం తుపాను బాధితులకు సహాయక చర్యలు అంతంత మాత్రంగానే ఉన్నాయని, ప్రస్తుతం కురుస్తున్న భారీ వర్షాల నేపథ్యంలో వెంటనే నష్ట నివారణ పద్దతులను చేపట్టాలని డిమాండ్ చేశారు.

వరద సహాయక ప్రాంతాల్లో ప్రజలకు ఆహారపదార్థాలను, మంచినీరు అందించే ఏర్పాట్లు చేయాలని ఆయన డిమాండ్ చేశారు. హెక్టారుకు 25 వేలు రైతులు సహాయం అడగగా 10 వేలు మాత్రమే ఇచ్చారని, ఈ విధంగా కేంద్ర రాష్ట్ర ప్రభుత్వాలు రైతుల పట్ల వివక్షత చూపుతున్నారని ఆయన ఆగ్రహం వ్యక్తం చేశారు. జనం ఓట్లతో గెలిచి ఇప్పుడు వారిని నిర్లక్ష్యం చేస్తున్నారని మండిపడ్డారు. సహాయ కార్యక్రమాల్లో భాగంగా ఎన్ టిఆర్ ట్రస్ట్ భవన్ లో కంట్రోల్ రూం ఏర్పాటు చేశామని చంద్రబాబు తెలిపారు.