ఆర్టీసీ సమ్మె విరమణకు షరతులు

Posted: 09/12/2013 07:36 PM IST

సమ్మె చేస్తున్న ఆర్టీసీ ఉద్యోగులు రవాణా శాఖ మంత్రి బొత్సా సత్యనారాయణ, ఆర్టీసీ మేనేజింగ్ డైరెక్టర్ ఎ.కె.ఖాన్ లతో జరిగిన సమావేశంలో ఒక షరతు మీద సమ్మె విరమిస్తామని చెప్పారు.  అదేమిటంటే, ఆర్టీసీని కార్పొరేషన్ గా కాకుండా ప్రభుత్వ సంస్థగా మార్చాలి.  అప్పుడు ప్రభుత్వ నియమాల ప్రకారం ఉద్యోగుల జీతభత్యాలుంటాయి.  మరెన్నో ప్రయోజనాలు ఉద్యోగులకు చేకూరుతాయి.  ఆర్టీసీ లాభనష్టాలతో సంబంధముండదు.  అభివృద్ధి బాగుంటుందని ఉద్యోగుల నమ్మకం. 

ఈ విషయంలో స్పందించిన బొత్సా సత్యనారాయణ, ఈ విషయాన్ని ముఖ్యమంత్రి కిరణ్ కుమార్ దృష్టికి తీసుకెళ్ళానని, కర్నాటక, తమిళనాడులలో రాష్ట్ర ప్రభుత్వాలు నడుపుతున్న రవాణా సంస్థలను అధ్యయనం చేయించవలసిందిగా ఆయనను కోరానని అన్నారు. 

అయితే ఇప్పుడు వెంటనే ఇది ఎలా సాధ్యమవుతుందని కూడా బొత్సా ప్రశ్నించారు.  ఒక పక్క ఆగస్ట్ 31 నుంచి ఆంధ్రా రాయలసీమలలో సమ్మె జరుగుతోంది.  బస్సులు రోడ్ల మీదకు రావటం లేదు.  రవాణా స్తంభించి సంస్థకు విపరీతమైన నష్టం వస్తోంది.  అయినా సమ్మె జరుగుతున్నది రాష్ట్ర విభజన విషయంలో నిరసనగా.  మరి దానికీ సంస్థను ప్రభుత్వం ఆధీనంలోకి తీసుకోవటానికి ఏమిటి సంబంధం అని బొత్సా అన్నారు. 

అయితే ఈ ప్రతిపాదన అంతకు ముందునుంచే నలుగుతోందని, బొత్సా స్వయంగా నష్టాలలో కూరుకుపోయిన ఆర్టీసీ సంస్థ ప్రభుత్వం జోక్యం లేకుండా ఎలా ముందుకు నడుస్తుంది అని అన్నారని ఎంప్లోయీస్ యూనియన్ జనరల్ సెక్రటరీ కె.పద్మాకర్ అన్నారు. 

సమ్మె బుధవారంతో 31వ రోజుకి చేరగా, విరమణ గురించి సెప్టెంబర్ 16 న తగు నిర్ణయం తీసుకుంటామని యూనియన్ లీడర్లు అన్నారు. 

-శ్రీజ