ఆరు నూరైనా 3 నెలల్లో తెలంగాణ

Posted: 09/06/2013 09:00 AM IST

పది జిల్లాలలో కూడిన తెలంగాణ రాష్ట్రాన్ని ఏర్పాటు చేస్తామంటూ ప్రకటించిన యూపీఏ ప్రభుత్వం ఎవరి మాట వినకుండా తనపని తాను చేసుకుపోతుంది. గత నెల రోజులకు పైగా సీమాంధ్రలో ఉద్యమాలు చేస్తున్నా, రాష్ట్రాన్ని సమైక్యంగా ఉంచాలని సీమాధ్రనాయకులు పట్టుబడుతున్నా వాటికి ఏమాత్రం తలొగ్గకుండా ‘ఇక మాటల్లేవ్... చేతలే ’ అంటూ ఆ పక్రియను వేగవంతం చేసింది. ఇప్పటికే తెలంగాణ ఏర్పాటుపై కేబినెట్ నోట్ రూపకల్పన మొదలుపెట్టిన కేంద్ర హోంశాఖ... దానికి సంబంధించిన ఒక ఒక కాపీని న్యాయశాఖకు కూడా పంపినట్లు ఢిల్లీ వర్గాల నుండి అందుతున్న తాజా సమాచారం. నిన్న మొన్నటి వరకు హైదరాబాద్ ను యూటీగా చేస్తున్నారంటూ వస్తున్న ఊహాగానాలకు కూడా ఈ నోట్ లో ఏమాత్రం తావివ్వలేదని తెలుస్తుంది. ‘మాట తప్పం... మడమ తిప్పం ’ అనే విధంగా కేంద్రం ఏ మాత్రం ఆలస్యం చేయకుండా తెలంగాణ ప్రక్రియ ఏర్పాటును మూడు నెలల్లో పూర్తి చేయడానికి నడుబిగించింది. ఏ మాత్రం రాష్ట్ర ఏర్పాటు జాప్యం అయినా శాంతి భద్రతల సమస్య తలెత్తే ప్రమాదం ఉండటంతో ఈ ఏడాది చివరి కల్లా రాష్ట్రాన్ని విభజించి రెండు రాష్ట్రాలు ఏర్పాటు చేయడమే లక్ష్యంగా ముందుకు సాగుతుందని ఢిల్లీలోని ఉన్నత వర్గాల నుండి అందుతున్న సమాచారం. న్యాయ శాఖకు పంపిన నోట్ లో యూటీ ప్రస్తావన తేకుండా కేవలం నదీ జలాల పంపిణీ, విద్యుత్ ఉత్పత్తి, సరఫరా, మూడు ప్రాంతాల్లో నివసించే వారందరి భధ్రత, పౌరులందరికీ ప్రాథమిక హక్కుల హామీ తదితర అంశాలను మాత్రమే ప్రస్తావించినట్లు సమాచారం

గత రెండు రోజుల పాటు ఢిల్లీలో పర్యటించిన రాష్ట్ర ముఖ్యమంత్రి కిరణ్‌కుమార్‌రెడ్డి, పీసీసీ అధ్యక్షుడు బొత్స సత్యనారాయణలతో పాటు, సీమాంధ్ర కేంద్రమంత్రులు, ఎంపీలు.. పదేపదే ఢిల్లీకి రావటం మానుకుని సీమాంధ్రలో పార్టీని బలోపేతం చేయటంపై దృష్టిపెట్టాలని అధిష్టానం పెద్దలు నిర్దేశించినట్లు కాంగ్రెస్ వర్గాలు అంటున్నాయి. ఈ ఏర్పాటు విషయంలో రాష్ట్రం నుండి ఏమైనా అడ్డంకులు ఏర్పడితే.... ప్రభుత్వాన్ని బర్తరఫ్ చేసైనా తెలంగాణ రాష్ట్రం ఏర్పాటు చేయడానికి సిద్దపడుతున్నట్లు తెలుస్తుంది. మొత్తానికి సీమాంధ్రులు చేస్తున్న ఆందోళనలు, వారు సమైక్య రాష్ట్రం పై పెట్టుకున్న ఆశలు ఆవిరైపోయినట్లే భావించాలి.