పాతాళానికి పడిన రూపాయి

Posted: 08/27/2013 08:01 PM IST

కేంద్రం ఎన్ని విధానాలు చేపట్టినా, రిజర్వ్ బ్యాంక్ ఎన్ని చర్యలు చేపట్టినా గానీ రూపాయి మారకం విలువ పతనం మాత్రం ఆగడం లేదు. వరుసగా రెండో రోజు కూడా రూపాయి భారీగా పతనం అయింది. నిన్న ట్రేడింగ్ ముగింపులో డాలర్‌తో రూపాయి విలువ రూ.64.30పైసలుగా నిలిచింది. నేటి ఉదయం  ప్రారంభంలోనే రూపాయి విలువ 64.33 పైసలకు చేరుకుంది. అదే విధంగా రోజంతా పతనం కొనసాగిన రూపాయి విలువ అత్యంత కనిష్ట స్థాయికి చేరుకొని 66.06 తో ముగిసింది. దిగుమతి దారులు, బ్యాంకుల నుండి నెల చివర్లో డాలర్లకు ఉండే గిరాకి రూపాయి పతనాన్ని శాసించింది. సోమవారం ఉదయం నుంచే క్షీణ దశలో పయనించిన రూపాయి నేటి వరకు కూడా పతన బాటలోనే పయనించింది. ముఖ్యంగా ముడి చమురు దిగుమతి చేసుకునే ఆయిల్ కంపెనీలతోపాటు ఖాతాదారుల నుండి ఒత్తిడితో పలు బ్యాంకులు డాలర్లను కొనుగోలు చేయడమే దీనికి కారణం. రూపాయి పతనం పై ఆర్థిక మంత్రి చిదంబరం మాట్లాడుతూ... దేశీయ కారణాల వల్లే రూపాయి పతనం చెందుతుందని కేంద్ర ఆర్థిక మంత్రి చిదంబరం పేర్కొన్నారు. రూపాయి విలువ సరైన స్థాయికి చేరుకుంటుందని భరోసా ఇచ్చారు. మే 22 నుంచి రూపాయిపై ఒత్తిడి ఉందని ఆయన తెలిపారు. పెట్టుబడులను ప్రోత్సహించేందుకు అన్ని రకాల చర్యలు తీసుకున్నామని చిదంబరం పేర్కొన్నారు. రూపాయి పతనంతో స్టాక్ మార్కెట్ల పై కూడా చాలా ప్రభావం పడింది. మధ్యాహ్నాం 590.5 పాయింట్లను నష్టపోయిన సెక్సెక్స్  17968.08 వద్ద చేరింది.  నిఫ్టీ 189.05 పాయింట్లు కొల్పోయి 5287.45 పాయింట్ల వద్ద స్థిరపడింది. రూపాయి మారక విలువ క్షీణించడంతో మార్కెట్లు తీవ్ర ఒత్తిట్లకు లోనైనట్లు విశ్లేషకులు చెబుతున్నారు. మరోవైపు బంగారం కూడా 32,000 మార్క్ స్థాయిని దాటింది. రూపాయి పతనంతో పెట్రోల్, డీజిల్ రేట్లు కూడా పెరగనున్నాయి.