మా చేతుల్లో ఏమీ లేదు.. ఒక్కసారి నిర్ణయం తీసుకున్నాక

Posted: 08/21/2013 09:55 AM IST

Divide and rue antony committee told to seemandhra congress leaders

సీమాంధ్రుల మనో భావాలను తెలుసుకునేందుకు కాంగ్రెస్ అధిష్టానం నియమించిన ఆంటోనీ కమిటీతో నిన్న రాత్రి సీమాంధ్ర ప్రాంతానికి చెందిన మంత్రులు, ముఖ్యమంత్రి కిరణ్ కుమార్ రెడ్డి విడివిడిగా భేటీ అయ్యారు. తన సమస్యలను, తమ ప్రాంతంలో జరుగుతున్న ఆందోళలను కమిటీతో చెప్పిన వారు రాష్ట్రాన్ని సమైక్యంగా ఉంచాలని, తెలంగాణ ఏర్పాటు నిర్ణయాన్ని పునఃపరిశీలించాని గట్టిగా వాదించినట్లు తెలుస్తుంది. సీమాంధ్రుల గోడును విన్న ఆంటోనీ కమిటీ మాత్రం వారికి గట్టి షాక్ ఇచ్చినట్లు తెలుస్తుంది. కాంగ్రెస్ వర్కింగ్ కమిటీ, యూపీఏ సమన్వయ కమిటీ తీసుకున్న తెలంగాణ ఏర్పాటు నిర్ణయాన్ని పునఃపరిశీలించటం తమ కమిటీ పరిశీలనాంశాల్లో లేదని, విభజన నిర్ణయం అమలులో ఎదురుకాగల సమస్యలను పరిశీలించి వాటికి తగిన పరిష్కారమార్గాలను సూచించటమే తమ కర్తవ్యమని ఆంటోని కమిటీ ముఖ్యమంత్రి కిరణ్‌కుమార్‌రెడ్డి, కాంగ్రెస్ సీమాంధ్ర ప్రజాప్రతినిధుల బృందానికి తేల్చిచెప్పినట్లు సమాచారం.

విభజన నిర్ణయాన్ని పునఃపరిశీలించే అంశం తమ అజెండాలో లేదని స్పష్టంచేసిన కమిటీ సభ్యులు.. రాష్ట్ర విభజన అమలులో ఎదురుకాగల సమస్యలు, వాటికి పరిష్కారాలను సూచించాల్సిందిగా వారికి నిర్దేశించినట్లు తెలుస్తుంది. దిగ్విజయ్ సీమాంధ్రుల విభజన నిర్ణయం ఏ పరిస్థితుల్లో తీసుకున్నామో వివరించినట్లు తెలిసింది. ఈ సందర్భంగా 2001లో వై.ఎస్.రాజశేఖరరెడ్డి ద్వారా తెలంగాణ ఏర్పాటుకు అనుకూలంగా నోట్ అందిందని ఆయన ప్రస్తావించినట్లు సమాచారం. గతంలో తెలంగాణ ప్రాంతంలో కూడా ఉవ్వెత్తున సాగిన ఉద్యమాలను చూశామని, పరిస్థితులు క్రమంగా చక్కబడతాయన్న ధీమా వ్యక్తం చేశారు. ఆంటోని కమిటీ 26-28 తేదీల్లో మూడు రోజుల పాటు సమావేశమై మరికొంత మంది పార్టీ నాయకుల, ఇతరుల అభిప్రాయాలను సేకరిస్తుందని దిగ్విజయ్ చెప్పారు.