రాజకీయ ప్రయోజనంతో రగిల్చిన విద్వేషాలు

Posted: 08/20/2013 03:32 PM IST

దేశంలో నేటి రాజకీయ పరిస్థితులు ఆ నాటి అత్యవర పరిస్థితులను తలపిస్తున్నాయని తెలుగుదేశం పార్టీ అధ్యక్షుడు చంద్రబాబు నాయుడు ఈ రోజు మీడియా సమావేశంలో తన అభిప్రాయాన్ని వ్యక్తపరచారు.  ఇంతటి దౌర్భాగ్య స్థితిని ఇంతవరకూ చూడలేదని, యుపిఏ ప్రభుత్వం వలన దేశం భ్రష్టుపట్టిపోయిందని ఆయన ఆరోపించారు.  

దేశంలో ఆర్థిక వృద్ధి రేటు పెరగటంతో నిరుద్యోగ సమస్య ముదిరిపోతోందని, విధాన నిర్ణయాలను సకాలంలో తీసుకోలేని ప్రభుత్వం పక్షవాతం వచ్చినట్లుగా ప్రవర్తిస్తోందని విమర్శించిన చంద్రబాబు నాయుడు, ఆర్థిక సంక్షోభం మీద ప్రభుత్వం అవగాహనను పెంచుకోవలసివుందని అన్నారు.  

ప్రధాన మంత్రి మీద విరుచుకుపడుతూ, బొగ్గు కుంభకోణంలో ఫైళ్ళు మాయమవుతున్నాయని, దానికి ప్రధానమంత్రి దగ్గర సమాధానం లేదని, 1991 లో ఉన్న దేశ పరిస్థితులు మరోసారి కలగవని ఆయన చెప్పటం హాస్యాస్పదంగా ఉందని చంద్రబాబు అన్నారు.  

తెలుగువారి ఆత్మగౌరవం కోసం ఆవిర్భవించిన తెలుగుదేశం పార్టీ రాష్ట్రంలో లోగడ ఎన్నో అభివృద్ధి కార్యక్రమాలను చేపట్టిందని చెప్పిన చంద్రబాబు, తెదేపా ఎక్కడ పుంజుకుని అదికారంలోకి వస్తుందో అని కాంగ్రెస్ పార్టీ హడావిడిగా తెలంగాణా ప్రకటన చేసారని చెప్తూ, కాంగ్రెస్ పార్టీ రాజకీయాలను ఎండగట్టారు.  తెరాసను కలుపుకుని తెలంగాణా లోనూ, వైకాపాను కలుపుకుని సీమాంధ్రలోనూ రాజ్యమేలవచ్చన్న ఆలోచనే కాంగ్రెస్ పార్టీ చేత అనాలోచితంగానిర్ణయం తీసుకునేట్టుగా చేసిందని ఆరోపించారాయన. ఈ ప్రక్రియలో ఇరు ప్రాంతాలవారి మధ్యలోనూ విద్వేషాలను రేపి తద్వారా ప్రయోజనాన్ని పొందవచ్చన్నదే కాంగ్రెస్ కుటిల రాజనీతని చంద్రబాబు ఘాటైన విమర్శలు చేసారు.  

-శ్రీజ