గ్రహాంతర యాత్ర ఓన్లీ డ్రాపింగ్

Posted: 08/12/2013 12:36 PM IST

మార్స్ ఒన్ ప్రోగ్రాం లో ఒక వైపు యాత్రకు లక్షమంది అర్జీలు పెట్టుకున్నారని నాసా తెలియజేసింది. 

అంగారక గ్రహానికి పోవటం వరకే కానీ తిరిగి రారు.  అక్కడే నివాసముంటారు.  ఇదీ ప్రోగ్రాం.  ఇది 2022 లో జరుగుతుంది కాబట్టి ముందస్తుగా బుకింగ్ లు జరిగగా లక్షమంది ఇప్పటికే సిద్ధమయ్యారూ అంటే వాళ్ళకి భూమ్మీది జీవనం ఎంత రోత పుట్టించిందో అర్థం చేసుకోవచ్చు.  సాహస యాత్రగా కొందరు తీసుకుంటే ఇక్కడి నుంచి పోతే అంతే చాలని కొందరు అనుకుంటూ గ్రహాంతర యాత్రకు రిజర్వేషన్ చేసుకుంటున్నారు. 

వివిధ దేశాలకు చెందిన 40 మంది సెప్టెంబర్ 2022 లో అరుణ గ్రహం వైపు అడుగులు వేస్తారు.  వాళ్ళు 2023 ఏప్రిల్ లో అంగారకుడి మీద పాదం మోపుతారు.  మరో రెండు సంవత్సరాల తర్వాత మరో నలుగురు వెళ్తారు కానీ వీరిలో ఎవరూ భూమ్మీదికి తిరిగి రారు.  అక్కడే ఉండిపోతారు.  అక్కడ కాలనీ నిర్మాణం జరుగుతుంది.  అందులో వీరంతా కాపురాలు చేస్తారు. అయితే ఈ ప్రోగ్రాం ఆషామాషీదేం కాదు.  6 బిలియన్ డాలర్ల ఖర్చుతో పూర్తవుతుందని అంచనా.  ఎనిమిది సంవత్సారాల కాలం గ్రహాంతర యాత్రికులకు శిక్షణ ఉంటుంది.  అయినా రేడియేషన్ పరిస్థితుల దృష్ట్యా 500 రోజులకంటే ఎక్కువ కాలం బ్రతకటం కష్టమని కూడా చెప్తున్నారు.

నాసా డెప్యూటీ డైరెక్టర్ క్రిస్ మూరే రేడియేషన్ కాదు కానీ అసలు గ్రహాంతర ప్రయాణమే ప్రమాదభరితమైనది కాబట్టి స్పేస్ క్రాఫ్ట్ ని జాగ్రత్తలు తీసుకుంటూ నిర్మించాలని ఇంజినీర్లకు ఆదేశాలిచ్చారట. 

లక్షమందిలో 44 మందికి మాత్రమే ఈ ప్రోగ్రాంలో చోటు దొరకబోతోంది.  అయితే శిక్షణా కాలంలోనూ, పూర్తయిన తర్వాత ఎంత మంది ఉత్సాహం చూపిస్తారు, టికెట్ ఖరీదింకా నిర్ణయించలేదు.  మిలియన్లలో ఉండే అంత పెద్ద మొత్తాన్ని ఎందరు భరించి ఈ సాహసయాత్రకు వెళ్తారన్నది వేచి చూడవలసిందే. 

-శ్రీజ