ఆంటోనీ కమిటీ స్థానంలో కేంద్ర ప్రభుత్వ కమిటీ

Posted: 08/10/2013 04:11 PM IST

Central govt committee in place of antony committee

లోక్ సత్తా పార్టీ ఈ రోజు హైద్రాబాద్ జుబ్లీ హాల్ లో రాష్ట్ర విభజన అంశం-సమస్యల పరిష్కారం మీద చర్చలకోసం రౌండ్ టేబల్ సమావేశం నిర్వహించారు.

విభజనకు సంబంధించి 26 అంశాలు ఈ చర్చలో చోటుచేసుకున్నాయి. రాష్ట్ర విభజన వలన సామాన్య ప్రజానీకం ప్రభావితమౌతుంది కాబట్టి సర్వజనుల ప్రయోజనాన్నీ దృష్టిలో పెట్టుకుని వ్యవహరించాలన్నారు లోక్ సత్తా పార్టీ నేత జయప్రకాశ్ నారాయణ.

రాయలసీమ, ఆంధ్ర, తెలంగాణా ప్రాంతాలలో కూడా సమస్యలు ఉన్నాయి కాబట్టి విభజన విషయంలో అందరి అభిప్రాయాన్నీ సేకరించటం, ప్రయోజనాలను సమీకరించటం అవసరమన్నారు జెపి. ప్రస్తుత పరిస్థితుల్లో ఉద్రిక్తంగా ఉన్న రాయలసీమ, ఆంధ్రా ప్రాంతాలలోని వారు తమ అభిప్రాయాలను ప్రశాంతంగా వినిపించవలసిందిగా ఆయన కోరారు.

విద్యార్థుల విద్యాసంవత్సరం నష్టపోకుండానూ, ప్రభుత్వ కార్యకలాపాలు సజావుగా సాగేట్టుగానూ జాగ్రత్త వహించాలని జెపి అభిలషించారు.

రౌండ్ టేబుల్ సమావేశంలో చేసిన తీర్మానాల్లో సమస్య మూడు ప్రాంతాల్లో ఉంది కాబట్టి మూడు ప్రాంతాల వారి అభిప్రాయాన్నీ తీసుకోవటం సమంజసం అని తేల్చారు.

ముఖ్యమైన తీర్మానాల్లో ప్రథమమైనది, ఆంటోనీ కమిటీ స్థానంలో కేంద్ర ప్రభుత్వం మరో కమిటీని ఏర్పాటు చేయటం. పౌరసమాజానికి కూడా రాష్ట్ర విభజన ప్రక్రియలో సముచిత పాత్రనివ్వాలి, తీసుకునే చర్యలను దీర్ఘకాలిక ప్రయోజనాల దృష్ట్యా తీసుకోవాలి అన్న తీర్మానాలు కూడా ప్రధానంగా చోటుచేసుకున్నాయి.

-శ్రీజ